Dövlət Gömrük Komitəsinin (DGK) sədri Aydın Əliyev büdcə öhdəliyinin icrasında problemin olmayacağına əmin olduğunu bəyan edib.

DGK sədri bunu deyib: "Cari ilin ilk 6 ayı ərzində  Dövlət Gömrük Komitəsi büdcə daxilolmaları ilə bağlı proqnoza tam əməl edib. Ümid edirəm ki, yenidən baxılan dövlət büdcəsində nəzərdə tutulan proqnozu da yerinə yetirəcəyik".

Qeyd edək ki, Milli Məclisin iyunun 30-da keçirilən plenar iclasında "Azərbaycan Respublikasının 2017-ci il dövlət büdcəsi haqqında" qanuna dəyişikliklər təsdiqlənib. Dəyişikliyə əsasən, 2017-ci ilin dövlət büdcəsinin gəlirləri 511 mln. manat və ya 3,1% artırılaraq 16 mlrd. 766 mln. manat, xərcləri isə 1 mlrd. 41 mln. manat artırılaraq 17 mlrd. 941 mln. manat proqnozlaşdırılıb. Gəlirlərdə artım Mərkəzi Bankın mənfəətindən ayırmalar üzrə 250 mln. manat, Vergilər Nazirliyi üzrə 135 mln. manat, Dövlət Gömrük Komitəsi üzrə 50 mln. manat və büdcə təşkilatlarının büdcədənkənar gəlirləri üzrə 76 mln. manat təşkil edəcək.

Qanuna əsasən, Dövlət Gömrük komitəsinin xətti ilə təmin edilən daxilolmaların proqnozu 2 mlrd. 250 mln. manat təşkil edir ki, bu da təsdiq olunmuş proqnozla müqayisədə 50 mln. manat və ya 2,3% çoxdur.

Gömrük orqanlarının xətti ilə gəlir növləri üzrə artım aşağıdakı kimi proqnozlaşdırılır:

- əlavə dəyər vergisi üzrə 1 mlrd. 674 mln. manat daxilolma nəzərdə tutulub ki, bu da 2017-ci ilin təsdiq olunmuş proqnozuna nisbətən 35 mln. manat və ya 2,1% çoxdur;

- gömrük rüsumları üzrə 469 mln. manat daxilolma nəzərdə tutulur ki, bu da 2017-ci ilin təsdiq olunmuş proqnozuna nisbətən 15 mln. manat və ya 3,3% çoxdur. Bu daxilolmaların artımına səbəb beynəlxalq maliyyə-kredit qurumları ilə birgə keçirilən infrastruktur layihələrində Azərbaycan tərəfinin iştirak payı üzrə 2017-ci ildə əlavə tələb olunan vəsaitlər hesabına idxal olunacaq mallar üzrə əlavə dəyər vergisinin və gömrük rüsumlarının ödənilməsidir.

© APA