15 noyabr 2022-ci il tarixində ölkəmizdə ilk dəfə olaraq yerli və beynəlxalq şirkətlərin Baş icraçı direktorları, dövlət qurumlarının rəsmiləri, iş adamları və sahibkarların iştirakı ilə idarəetmə sahəsində dünyada tətbiq olunan yeniliklər, bu sahədə müasir innovasiyalar və texnologiyanın inkişafı, qabaqcıl təcrübələrin dialoqlar, müzakirələr və fikir mübadilələri ilə paylaşılmasını hədəfləyən “Baku International CEO Summit” tədbiri baş tutacaq. Tədbirin təşkilatçısı Azərbaycan HR İnstitutudur.

Təşkilatçının yaydığı məlumatda bildirilir ki, "Baku International CEO Summit" Azərbaycan Respublikası Prezidenti cənab İlham Əliyevin 2021-ci il 2 Fevral tarixli Sərəncamı ilə təsdiq edilmiş Azərbaycan 2030: sosial iqtisadi-inkişafa dair növbəti illər ərzində reallaşdırılması planlaşdırılan "Milli prioritetlər"dən birincisi “Dayanıqlı artan rəqabət qabiliyyətli iqtisadiyyat” prioritetinə əsaslanaraq ölkəmizdə korporativ idarəetmənin daha da gücləndirilməsi üçün “Daha yaxşı gələcək naminə” şüarı ilə həyata keçiriləcək.

Azərbaycan HR İnstitutunun direktoru Emil Hüseynov tədbirin təşkili ilə bağlı məlumat vermişdir:

“Bu miqyaslı tədbiri keçirməkdə məqsədimiz yerli və beynəlxalq şirkət rəhbərləri, dövlət qurumlarının vəzifəli şəxslərinin öz təcrübələrini bir-biriləri ilə paylaşmasına imkan yaratmaq, o cümlədən dünyada idarəetmə sahəsində baş verən yenilikləri qlobal şirkət nümayəndələrin dilindən eşitməkdir. Hal-hazırda yerli və qlobal şirkətlərin rəhbərləri ilə danışıqlarımız davam edir. Onların bu tədbirə maraq göstərməsi və təcrübələrini paylaşmaq istəkləri bizim üçün sevindirici haldır. Tədbir 3 paneldən ibarət olacaq. Hər panelin mövzusu 1 moderator və 4 əsas spiker tərəfindən təqdim ediləcək. Panellərdə həm yerli və beynəlxalq, həm də dövlət qurumlarının rəhbərləri çıxış edəcəkdir. Tədbir iştirakçıları qlobal bazarda idarəetmə trendləri və onun gələcək imkanları, rəqəmsal transformasiya, yeni müştəri portreti və onun davranışları və s. maraq kəsb edən mövzularla bağlı yeni fikir və təcrübələrə sahib olacaqlar.” 

“Baku International CEO Summit” tədbirində iştirak etmək üçün biletləri https://ebilet.store/event_BICEO22/ linki vasitəsi ilə qeydiyyatdan keçməklə əldə edə bilərsiniz.

Qeyd edək ki, Azərbaycan HR İnstitutu 28 Yanvar 2022-ci il tarixində “Baku International HR Forum” tədbiri uğurla təşkil etmişdir. 6 ölkədən 16 spiker və 300-dən çox iştirakçının qatıldığı forumda insan kapitalının inkişafı, gələcək innovasiyalar və idarəetmə panelləri üzrə peşəkar müzakirələr və qarşılıqlı təcrübə mübadiləsi aparılmışdır. Forumun baş sponsorları Kapital Bank, Azercell Telekom, sponsorları MKT Cotton şirkəti və Wellbeing Academy Türkiyə olmuşdur.