ABŞ-ın keçmiş maliyyə naziri Lourens Summers Böyük Britaniyanın yeni təyin olunmuş baş naziri Liz Trussın maliyyə siyasətini tənqid edərək, bunların nəticəsində Funt sterlinq/dollar məzənnəsinin 1-dən aşağı düşə biləcəyi ilə bağlı xəbərdarlıq edib.

Marja xəbər veri ki, ötən cümə günü hökumətin vergiləri azaltmaq planını elan etdikdən sonra funt sterlinq 1985-ci ildən bəri yeni minimum səviyyəyə düşüb. Böyük Britaniyanın rəsmi valyutasının dəyəri psixoloji əhəmiyyətli 1,1 dollardan aşağı düşüb və funt sterlinq 1,0840 dollara satılıb.

İlin əvvəlindən funt-sterlinq dollar qarşısında 18,5% ucuzlaşıb. Cümə günü funt avro qarşısında 1%-dən çox dəyər itirib. Bir funt 1,1204 avroya başa gəlib.

“Financial Times” qəzetinin yazdığına görə, milli valyutanın kəskin ucuzlaşması investorların azaldılan vergilərə görə büdcənin itirəcəyi vəsaiti ödəmək, eləcə də ev təsərrüfatları və bizneslər üçün elektrik enerjisinin qiymətinin "dondurulmasını" ödəmək üçün kütləvi şəkildə dövlət borclanmasının fiskal qeyri-sabitliyə gətirib çıxaracağı ilə bağlı narahatlığını əks etdirir.

Hökumətin hesablamalarına görə, əhali üçün elektrik enerjisi tariflərinin uzunmüddətli dondurulması da daxil olmaqla, antiböhran tədbirləri paketinin dəyəri oktyabr ayından başlayaraq altı ay ərzində büdcəyə 60 milyard funt-sterlinqə başa gələcək. "The Economist"ə görə, ümumi vergi endirimi ildə təxminən 30 milyard funt sterlinq ola bilər ki, bu da ÜDM-in 1,2%-i ilə müqayisə edilə bilər. “Daily Telegraph” qəzeti daha yüksək məbləği qeyd edir -  vergilərin azaldılması nəticəsində büdcənin itirdiyi gəlirin ümumi məbləği ildə təxminən 45 milyard funt sterlinq ola bilər ki, bu da ÜDM-in 1,8%-inə bərabərdir. Nəşrin hesablamalarına görə, elektrik enerjisinin qiymətlərinin dondurulması üçün subsidiyalar iki il ərzində büdcəyə 150 ​​milyard funt-sterlinqə başa gələ bilər.

"Financial Times"ın məlumatına görə, hakimiyyət dövlət istiqrazlarının buraxılışını artırmaqla kütləvi borclanmaları maliyyələşdirmək niyyətindədir. Beləliklə, Böyük Britaniyanın Borc İdarəetmə Agentliyi 2022-2023-cü illərdə dövlət istiqrazlarının satışını 62,4 milyard funt sterlinq artıraraq 193,9 milyard funt-sterlinqə çatdırmaq niyyətindədir. Bu fonda Böyük Britaniyanın on illik dövlət istiqrazlarının gəlirliliyi həftə ərzində 0,5 faiz bəndi artaraq 3,77%-ə çatıb.

Qəzet "Janus Henderson Investors"un istiqraz portfeli meneceri Bethany Payne-dən sitat gətirib: "Bu nəhəng vergi endirimi iqtisadiyyatda radikal bir "qumardır". Britaniyanın borcunu qeyri-sabit vəziyyətə sala bilər".