Bölgələrdə fermerlər tərəfindən iri, çoxşaxəli təsərrüfatların yaradılması öz bəhrəsini verməkdədir. Belə təsərrüfatlarda növbəli əkin sisteminin tətbiqi, əkinlərin planlı təşkili, düzgün aqrotexniki qulluq yüksək məhsuldarlığa səbəb olur ki, bu da ölkəmizdə ərzaq təhlükəsizliyinə xidmət edir.

Tərtər rayonun İsmayılbəyli kənd sakini Mirzə Cümşüdov da 110 hektar sahədə müxtəlif kənd təsərrüfatı məhsulları becərir. Növbəli əkinin tətbiq edildiyi təsərrüfatda taxıl, pambıq, qarğıdalı, günəbaxan, şəkər çuğunduru, soya bitlikləri, fındıq və tut tingləri əkilib.

Mirzə Cümşüdov bildirib ki, növbəli əkin sisteminin tətbiqi ilə hər rotasiyadan sonra torpağın təbii münbitliyi artır və bununla da becərilən kənd təsərrüfatı bitkilərinin məhsuldarlığı yüksəlir.

Əsasən ənənəvi və ixracyönümlü məhsulların becərilməsinə üstünlük verən fermer bu il 11 hektar ərazidə çiyid səpini həyata keçirib. Yaxşı çıxış əldə edilib. Pambığın becərilməsində müasir texnikalardan istifadə olunur. Hazırda pambıq sahələrində aqrotexniki qulluq işləri aparılır. Ötən il yüksək məhsuldarlıq əldə edən fermer cari ildə də hər hektardan 35 sentner məhsul götürəcəyini deyir.

Təsərrüfatın əsasını təşkil edən bitki növlərindən biri də taxılçılıqdır. 80 hektarda taxıl yetişdirən fermer səpin zamanı, əsasən, “Zirvə-85” buğda və “Qarabağ-22” arpa sortlarına üstünlük verib. Taxılın məhsuldarlığına və keyfiyyətinə təsir edən xəstəlik, zərərvericilərə və alaq otlarına qarşı vaxtlı-vaxtında mübarizə tədbirləri aparılıb. Nəticədə zəmilərdə bol məhsul yetişib. Arpa zəmilərinin hər hektarından 47 sentner məhsul götürən fermer yaxın günlərdə buğda biçininə başlanılacağını bildirib. Buğda sahələrinin hər hektarından 50 sentnerdən çox məhsul istehsalı gözlənilir.

Taxıl biçini başa çatan kimi eyni ərazidə ikinci dəfə qarğıdalı əkini həyata keçiriləcək. Hazırda arpa biçilən sahələrdə şum işləri aparılır. Beləliklə də fermer bir ildə həm iki dəfə məhsul əldə edir, həm də dövlətdən iki dəfə subsidiya alır.

Təsərrüfatın gəlirli sahələrindən biri olan şəkər çuğunduru əkininə də xüsusi diqqətlə yanaşılır. 5,5 hektarda becərilən şəkər çuğundurunun yığımına sentyabr ayında başlanılacağını deyən Mirzə Cümşüdov hər hektardan orta hesabla 60 tondan yuxarı məhsul istehsalı gözlənildiyini bildirib. Əldə edilən məhsul İmişli şəkər zavoduna təhvil veriləcək.

Bundan başqa, təsərrüfatda 6 hektarda qarğıdalı, 4 hektarda soya, 2 hektarda günəbaxan, 8 hektarda yonca, 3 hektarda 5100 ədəd fındıq tingi əkilib.

Ölkəmizdə baramaçılığa göstərilən dövlət qayğısından ruhlanan Mirzə Cümşüdov cari ildə 2 qutu (38 qram) ipəkqurdu toxumu da bəsləyib və 120 kiloqram barama istehsal edib. Gələcəkdə baramaçılığı daha da inkişaf etdirmək istəyən fermer 1,65 hektarda Çindən gətirilmiş 16 min 500 ədəd tut tingi əkib. Hazırda tut tinglərinə aqrotexniki qulluq göstərilir.

© Azərtac