23-26 iyun tarixlərində UNEC Beynəlxalq Magistratura və Doktorantura Mərkəzinin təşkilatçılığı, PAŞA Holdinq Şirkətlər qrupunun baş sponsorluğu, Fil Agency-nin təşkilati dəstəyi və kreativ tərəfdaşlığı, Facemark MMC-nin təşkilati dəstəyi ilə IV İqtisadiyyat və İdarəetmə Sahəsində Tədqiqatçıların Beynəlxalq Elmi Konfransı keçiriləcəkdir.

Konfransın keçirilməsində əsas məqsəd elmlərarası tədqiqatların inkişafının dəstəklənməsi, elmin müasir meyilləri üzrə fikir mübadiləsinin aparılmsı və təcrübə paylaşımı, tədqiqatların əlçatanlığının və keyfiyyətinin yüksəldiməsi, eləcə də elmi əməkdaşlıq əlaqələrinin qurulması və yeni beynəlxalq elmi platformanın yaradılması ilə bağlıdır.

Konfransa ABŞ, Almaniya, Fransa, İtaliya, İsveçrə, Çin, Macarıstan, Polşa, İspaniya, İsrail də daxil olmaqla, dünyanın 30-a yaxın ölkəsindən 600-dən çox tədqiqat işi təqdim edilib. Həmin məruzələrdən elm komitəsi tərəfindən seçilmiş ən keyfiyyətli məqalələr SCOPUS platformasında indekslənəcəkdir.  Konfransda seçilmiş tədqiqat işlərindən ibarət “Qarabağ və Şərqi Zəngəzurun İqtisadi İnkişafında İnvestisiyaların Rolu”, “Qarabağda biznes mühiti və Kiçik və Orta Biznesin İnkişafı” və “Qarabağ və Şərqi Zəngəzurun İqtisadi Potensialının Sektoral Qiymətləndirilməsi” adlı 3 kitabın təqdimatı baş tutacaqdır. Bundan əlavə konfransa təqdim olunmuş tədqiqat işlərinin xülasələrindən ibarət kitab da hazırlanaraq gələn qonaqlara təqdim olunacaqdır. Dünyanın nüfuzlu elmi nəşriyyatlarından olan SPRINGER nəşriyyatı ilə birlikdə “Green Economy and Green Financing” başlıqlı kitabın nəşri də nəzərdə tutulmuşdur.

Konfransda 50-dən çox tanınmış yerli və xarici mütəxəssislərin iştirakı ilə aktual mövzularda “workshop”lar da təşkil olunacaq.

Konfrans çərçivəsində, UNEP, Azərbaycan Respublikası İqtisadiyyat Nazirliyi, Sahibkarlığın İnkişafı Fondu, Təmiz Şəhər ASC, Azərbaycan Beynəlxalq Bankı, McDonald`s kimi qurumların mütəxəssislərinin iştirakı ilə “Green Day” çərçivəsində “Dairəvi İqtisadiyyat və Yaşılq Artımın Maliyyələşdirilməsi” panelində maraqlı müzakirələr aparılacaqdır.

Qeyd edək ki, Konfransın  “Baku Marriott Hotel Boulevard”da təşkil olunacaq açılış mərasimi, panel və “workshop”ların hər biri sosial şəbəkələr vasitəsilə canlı yayımlanacaqdır.