Çərşənbə axşamı Yaponiya yeninin dollara nisbətdə məzənnəsi 20 il iki ayın ən aşağı səviyyəsinə düşüb. Marja.az xəbər verir ki, bunu ticarət məlumatları göstərir. 

Hazırda bir dollar 131,92-131,94 yen təşkil edir. Eyni zamanda, bazar ertəsi Nyu-Yorkda keçirilən ticarət sessiyası zamanı bu rəqəm bir dollar üçün 132,6 yen səviyyəsini görüb.

Avro/yen cütlüyündə də oxşar vəziyyət yaranır. Avropa valyutası hazırda 141,00-141,10 yen səviyyəsində ticarət olunur ki, bu da 2015-ci ilin yayından bəri ən yüksək səviyyəsidir.

Koronavirus pandemiyası ilə bağlı vəziyyətin sabitləşməsindən sonra iqtisadi canlanma əlamətləri fonunda ABŞ-ın Federal Ehtiyatlar Sistemi (Fed), eləcə də Avropanın mərkəzi bankları Yaponiya Mərkəzi Bankından fərqli olaraq son vaxtlar pul siyasətini sərtləşdirirlər. Bu, faiz dərəcələrindəki boşluğu nəzərə alaraq, yeni satmaq üçün sövdələşmələri stimullaşdırır.

Yaponiyada milli valyutanın ucuzlaşması idxal mallarının, ilk növbədə enerjinin qiymətlərinin artmasına səbəb olur.

Yaponiya hökuməti yeninin dollara nisbətdə ucuzlaşmasından təşvişə düşüb

Yaponiya hökuməti çərşənbə axşamı yenanın dollara nisbətdə ciddi ucuzlaşmasından narahatlığını bildirib. Maliyyə naziri Şuniçi Suzuki Tokioda keçirdiyi mətbuat konfransında deyib ki, kəskin valyuta dalğalanması arzuolunmazdır.

"Hökumət yenin ucuzlaşmasının Yaponiya iqtisadiyyatına necə təsir edəcəyini yaxından izləyir",- nazir deyib. Suzukinin sözlərinə görə, hazırda enerji daşıyıcıları, xammal və ərzaq məhsullarının qlobal qiymət artımı nəticəsində biznes mühitində də pisləşmə təhlükəsi var.

Yenin ucuzlaşmasının səbəbi Yaponiya Mərkəzi Bankının yumşaq pul siyasətini davam etdirməsi, iqtisadiyyatı canlandırmaq üçün kredit faizini faktiki olaraq mənfi səviyyədə saxlamasıdır. Eyni zamanda, ABŞ və Avropa İttifaqı maliyyə orqanları inflyasiyanın qarşısını almaq üçün kredit şərtlərini sərtləşdirirlər. ABŞ və Aİ-də məzənnələrin artması dollar və avro ilə ifadə olunan maliyyə alətlərinə investisiya qoyuluşunu daha sərfəli edir və  bu valyutaya tələbin artmasına səbəb olur.

Eyni zamanda, Yaponiya Bankının rəhbəri Haruhiko Kuroda çərşənbə axşamı parlamentdə maliyyə siyasətində dəyişiklik etmək niyyətində olmadığını bir daha bəyan edib. "Kyodo" xəbər agentliyi qeyd edir ki, bu, yenin ucuzlaşmasına daha da təkan verə bilər. Milli valyutanın ucuzlaşması yapon ixracatçıları üçün sərfəli olsa da, idxal olunan malların, o cümlədən enerji resurslarının və ərzaq məhsullarının qiymətlərinin artmasına səbəb olur.