(®) Heydər Əliyev adına Müasir Təhsil Kompleksinin “GreenLines” komandası Teknofest 2022 yarışmasında "Yaşıl" texnologiyalar kateqoriyası üzrə 1-ci yer qazanmışdır.

Şagirdlərin hazırladıqları layihə meşə yanğınlarının qarşısını vaxtında almaq üçün nəzərdə tutulmuşdur. Layihənin ideyası 2021-ci ildə Türkiyədə baş verən meşə yanğınlarından sonra yaranmışdır.

Layihəyə festivala gələn ziyarətçilər tərəfindən olduqca böyük maraq var idi. Jüri səsverməsindən sonra layihə ən yüksək xal toplayaraq qalib olmuşdur.

Qalib gələn komandamızı Azərbaycan Respublikasının Prezidenti cənab İlham Əliyev, Türkiyə Respublikasının Prezidenti cənab Rəcəb Tayyib Ərdoğan və Nobel mükafatı laureatı cənab Əziz Sancar təltif etmişdir.

Qeyd edək ki, komandanın kapitanı İmran Nəsibov keçən il Türkiyədə keçirilmiş "Teknofest 2021" yarışmasında Azərbaycanı təmsil etmişdir. İmranın təqdim etdiyi "Zəfər yolu" kosmik stansiya modeli insanların uzun müddət Kosmosda yaşayışını təmin etmək üçün nəzərdə tutulmuşdur.

Kompleksimiz ümumilikdə "Teknofest 2022" yarışmasında 4 komanda üzrə təmsil olunurdu. Bu komandalardan 2-si “SkyDreams” və “New Generation’s Business” “Baku Skills”, digər 2 komanda “GreenLines” və “gFuture” isə “Yaşıl” texnologiyalar kateqoriyası üzrə iştirak edirdi. “Yaşıl” texnologiyalar kateqoriyasında yarışan digər komandamız “gFuture” yarışmada 3-cü yer qazanmışdır. Gənc ixtiraçı şagirdlərin hazırladıqları layihə külək enerjisindən şəhər mühitində əlverişli istifadə üçün nəzərdə tutulmuşdur. Bu komandanın kapitanı Səid Nəsibov dəfələrlə beynəlxalq riyaziyyat və informatika olimpiadalarının qalibi olmuş və bu il dünyanın top universitetlərindən biri olan “University College London”a (UCL) qəbul olmuşdur.

Ölkəmizdə keçirilən bu cür texnologiya sərgiləri azərbaycanlı gənclərin, məktəblilərin gələcək karyerasının qurulmasında, inkişafyönümlü olmasında və dünyagörüşünün artırılmasında böyük rol oynayır. Əminik ki, "Teknofest Azərbaycan" festivalında iştirak edən startapçılar və gənc ixtiraçılar ölkəmizin gələcəyi naminə möhtəşəm işlər görəcəklər.

https://www.mtk.edu.az/az20/

Səməd Vurğun küçəsi 151

www.mtk.edu.az

admissions@mtk.edu.az

+994552028401