Böyük Britaniyanın xeyriyyə təşkilatı Oxfam-ın hesabatına görə, qida və enerji milyarderlərinin sərvəti son iki ildə enerji və əmtəə qiymətlərindəki kəskin artımlar nəticəsində 453 milyard dollar artıb.

Marja.az "Oxfam"ın hesabatına istinadən xəbər verir ki, sürətlə artan ərzaq qiymətləri səbəbindən son 24 ayda “62 yeni qida milyarderi” meydana çıxıb.

Dünyanın ən böyük qida şirkətlərindən biri olan "Cargill" ailəsinə mənsub milyarderlərin sayı pandemiyadan əvvəl 8-dən 12-yə yüksəlib. Üç qida nəhəngi ilə birlikdə "Cargill" dünya kənd təsərrüfatı bazarının 70 faizinə nəzarət edir.

“263 milyon insan yoxsulluq həddindən aşağı düşəcək”

Keçən il orta hesabla 30 faiz artan ərzaq qiymətlərinin pandemiyadan əvvəlki ilə müqayisədə 263 milyon daha çox insanı yoxsulluq həddinin altına salacağı gözlənilir. Bu rəqəm Böyük Britaniya, Fransa, Almaniya və İspaniyanın ümumi əhalisinə bərabərdir və ilin sonuna qədər gündə 1,90 dollarla yaşayan insanların sayını 860 milyona çatdıracaq.

Oxfam Davosda toplaşan dünya liderlərini son 20 ilin ən ciddi yoxsulluq problemini super varlılara sərvət vergisi tətbiq etməklə həll etməyə çağırıb.

Xeyriyyə təşkilatı, Argentinanın pandemiya zamanı milyarderlərə tətbiq etdiyi birdəfəlik vergiyə istinad edərək hökumətlərin oxşar yolu tutmalı olduğunu qeyd edib. Argentina ötən il vergi yığımını 1,5 milyard dollar artırıb.

Təşkilat “nəhəng sərvət və güc monopoliyalarının” yaradılmasının qarşısını almaq üçün daimi sərvət vergisi təklif edib. Belə ki, sərvət vergisi milyonçular üçün 2%, milyarderlər üçün isə 5% oolarsa illik 2,5 trilyon gəlir təmin edər. Oxfam qeyd edir ki, bu rəqəm 2,3 milyard insanı yoxsulluqdan xilas edəcək, aşağı və aşağı-orta gəlirli təbəqələrdə olan hər kəs üçün universal sağlamlıq və sosial müdafiəni təmin edəcək.

Qurumun üçüncü tələbi bütün iri şirkətlərin gözlənilməz gəlirlərinə əlavə vergilər qoymaqla böhrandan sui-istifadənin qarşısını almaqdır. Əvvəllər İngiltərədəki Leyboristlər Partiyası neft və qaz şirkətləri üçün oxşar təkliflə çıxış etmişdi.

Oxfam vurğulayır ki, bu vergi yalnız ən böyük 32 transmilli şirkətə tətbiq edilərsə, 2020-ci ildə 104 milyard dollar resurs əldə edilə bilər.

Oxfam, Covid-19 böhranının milyarderlər üçün tarixdə qeydə alınan ən yaxşı dövr olduğuna diqqət çəkib. Pandemiya dövründə 573 yeni milyarderin yarandığı bildirilir.

Forbes jurnalının siyahısına görə, dünya milyarderlərinin ümumi sərvətinin 12,7 trilyon dollar olduğu təxmin edilir. Bu rəqəm dünya ÜDM-nin 13,9 faizinə bərabərdir.