Azərbaycanda 2017-2021-ci illər ərzində qaz hasilatı təxminən 73% artıb.

Bu barədə "S&P Global Ratings" ("S&P") beynəlxalq reytinq agentliyinin yaydığı məlumatda bildirilir.

Hesabatda bildirilir ki, 2025-ci il üçün bu göstərici daha 20% artacaq: “Buna baxmayaraq, hasilatın artımını nəzərə alsaq da, ortamüddətli perspektivdə neftin 80%-ə yaxın töhfəsi ilə müqayisədə qaz ixracı Azərbaycan iqtisadiyyatında nisbətən cüzi rol oynayacaq və karbohidrogen ixracının təxminən 20%-ni təşkil edəcək”.

Hesabatda vurğulanır ki, Avropada qazın spot qiymətləri rekord həddə çatsa da, Azərbaycan bundan qismən faydalanacaq, çünki ölkənin qaz müqavilələrinin əksəriyyəti uzunmüddətlidir və qiymətlər neftə bağlıdır.

Qeyd edək ki, Azərbaycan qazı Avropaya Cənubi Qafqaz, Ttans-Anadolu (TANAP və Trans-Adriatik (TAP) qaz kəmərləri ilə nəql olunaraq çatdırılır. Cənub Qaz Dəhlizinin 878 kilometrlik hissəsində qaz xətti olan TAP ilə "mavi yanacağ"ın kommersiya məqsədli nəqlinə ötən il dekabrın 31-də başlanılıb.

Xatırladaq ki, Cənub Qaz Dəhlizi layihəsinin bir hissəsi olan TAP kəməri ilə "Şahdəniz-2" layihəsi çərçivəsində hasil olunan qazın ilkin olaraq ildə 10 mlrd. kubmetrinin Avropaya nəqli nəzərdə tutulur. Bu boru kəməri Yunanıstan, Albaniya və Adriatik dənizindən keçməklə İtaliyanın cənubuna qədər uzanan Kəmərin potensialı onun ötürücülük gücünü iki dəfə artıraraq, ildə 20 mlrd. kubmetrə çatdırmağa imkan verir.

Azərbaycanda neft hasilatı artacaq

"S&P Global Ratings"ə görə, Azərbaycanda bu il gündəlik ortalama neft hasilatının 2022-ci ildə 0,77 barelədək yüksələcək.

“Buna baxmayaraq, orta müddətli perspektivdə biz gündəlik neft hasilatının 2025-ci il üçün 0,75 min barelədək azalacağını proqnozlaşdırırıq. Hasilatın saxlanılması və ya artırılması mövcud neft yataqlarına əlavə sərmayələr tələb edəcək, lakin onların edilib-edilməyəcəyi hələ ki bəlli deyil”, - proqnozda bildirilir.

Hesabatda qeyd olunur ki, Azərbaycan iqtisadiyyatı əhəmiyyətli dərəcədə neft-qaz sektorundan asılıdır və bu sektor hazırda əlverişli qlobal neft qiymətlərindən bəhrələnir. Neft və qaz ixracın təxminən 90%-ni əhatə edir və Azərbaycanın ÜDM-nin 50%-ni təşkil edir.

Xatırladaq ki, Neft İxrac Edən Ölkələr Təşkilatının (OPEC) sonuncu hesabatına əsasən, 2021-ci ildə Azərbaycanda maye karbohidrogenlərin (neft və qaz kondensatı) hasilatı 740 min barel səviyyəsində olub.

Telegramda Marja.az səhifəsinə abunə olun

APA