Ehtiyat (rezerv) valyutası olan ABŞ dollarının pik səviyyələrdə olduğuna dair gözləntilər artıb.

Marja.az xəbər verir ki, "Brandywine Global Investment Management" əmtəə valyutalarını bəyəndiyini, "Blakley Advisory Group" isə qızıl və gümüşü bəyəndiyini bildirib.

Keçən ay dollarda qısa mövqe tutan "Brandywine"in valyuta meneceri Jack McIntyre, "Dollar pik həddə çatıb. Həddindən artıq dəyərlənib. Dolların ucuzlaşması ilə bağlı gözləntilərimin əsas səbəbi qlobal iqtisadi artımın canlanmasıdır" şərhini edib.

Nyu Cersidəki "Bleakley" Məsləhət Qrupunun İnvestisiya Məsləhətçisi Piter Buckvar, "Keçən il dolların bahalaşmasının səbəbi Fed-in sərtləşmədə Yaponiya və Avropa Mərkəzi Banklarını qabaqlaması idi" deyib: "Bu mühitdə mən qızıl və gümüşü dollara alternativ olaraq sevirəm".  

ABŞ dollarının mühüm valyutalar qarşısında dəyərini ölçən Bloomberg Dollar İndeksi, dünənki proqnozlara yaxınlaşan inflyasiya məlumatlarından sonra 0,6% ilə may ayından bəri ən böyük ucuzlaşmasını qeyd edib.

İnvestorların fikrincə, ABŞ-ın ticarət kəsirinin genişlənəcəyi barədə proqnozlar və qlobal iqtisadiyyatın bərpası ilə bağlı gözləntilər dolları aşağı salacaq, ABŞ-dan kənar aktivlərə marağı artıracaq.

"K2 Wealth Management"dən George Boubouras, Çili pesosundan Cənub-Şərqi Asiya istiqrazlarına qədər hər cür fürsətə baxdıqlarını söyləyib. Boubouras, dolların "zirvəsinin" geridə qaldığını və inkişaf etməkdə olan bazarlardan Avropaya bir çox səhm və istiqrazda fürsətlərin olduğunu bildirib.

Bostondakı "Barings" İnvestisiya İnstitutu da dolların inkişaf etməkdə olan bazar valyutaları qarşısında ucuzlaşmasını gözləyən qurumlardan biridir. Baş qlobal strateq Kristofer Smart deyib: "Daha pandemiyanın idarə olunduğu bir iqlimdə dolların ucuzlaşması qlobal canlanmanın təbii hissəsidir. İqtisadi fəaliyyət normallaşdıqca, dünyanın digər hissələrinə daha çox kapital axını olacaq. İqtisadiyyatın bərpası inkişaf etməkdə olan bazar valyutalarına fayda verəcək”.

Yüksəlişi gözləyənlər də var

Bəziləri dolların ucuzlaşacağını gözləsə də, digərləri ucuzlaşmanın tez olduğunu bildirirlər.

"DailyFX"dən İlya Spivak, ABŞ-ın dünənki inflyasiya rəqəminin heç bir şahin sürprizi ehtiva etməməsi və Fed sədri Jerome Powell-in son açıqlamaları ilə əlaqədar olaraq, "Dolların hələ zirvəyə çatdığını düşünmürəm" şəkilində fikir bildirib.

"Citigroup Global Markets" ABŞ-ın faiz dərəcələrindəki artımın və FED-in monetar sərtləşdirməsinin inkişaf etməkdə olan bazar faizləri və valyutaları üçün ümumiyyətlə mənfi olduğunu bildirib.