Azərbaycan Respublikası Nazirlər Kabinetinin 2021-ci il 20 dekabr tarixli Qərarı ilə “Açıq tender və ya kotirovka sorğusu üsulunu tətbiq etməklə elektron satınalma vasitəsilə keçirilən satınalmalarda iştirak haqqının məbləği, ödənilməsi və ondan istifadə qaydası” təsdiq edilib. Qərarın tətbiqi kotirovka sorğusu prosedurunun tamamilə elektronlaşdırılması, sahibkarların dövlət satınalmalarında iştirakının əlçatanlığının və şəffaflığın təmin edilməsinə, aşkarlıq əsasında bütün sahibkarlara bərabər rəqabət mühitinin yaradılmasına xidmət edəcəkdir.

Marja xəbər verir ki, bu, İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin yaydığı məlumatda bildirilir.

Qərara əsasən, kotirovka sorğusu metodu ilə təşkil edilən bütün satınalmalar dövlət satınalmalarının vahid internet portalı (etender.gov.az) vasitəsilə həyata keçiriləcək.

Daha bir mühüm məqam isə açıq tenderin keçirilməsi üçün iştirak haqqının aşağı salınmasıdır. Belə ki, ehtimal olunan qiymətdən asılı olaraq, iştirak haqqı 100-1500 manat arasında olacaq.

"İştirak haqqının sabit məbləğdə olması və aşağı salınması açıq tenderlərdə, xüsusilə iri həcmli satınalmalarda mikro, kiçik və orta sahibkarların fəal iştirakını stimullaşdıracaq. Bununla da, dövlət vəsaitinin qənaətlə və səmərəli istifadə edilməsinə və rəqabətdən irəli gələrək daha keyfiyyətli malların (iş və xidmətlərin) əldə olunmasına zəmin yaranacaqdır", - məlumatda bildirilir. 

İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti sahibkarları dövlət satınalmalarında fəal iştiraka və hüquq pozuntuları ilə rastlaşdıqda Dövlət Xidmətinə müraciət etməyə çağırır. Bununla yanaşı, dövlət müəssisə və təşkilatlarını satınalmaların təşkili və keçirilməsi zamanı qanunvericiliyin tələblərinə tam riayət etməyə, satınalmalar barədə dərc olunan elanlarda alınacaq mallar (işlər və xidmətlər) barədə məlumatları ətraflı yerləşdirilməyə, elektron satınalmaların iştirakçılarını əlaqələri yalnız etender.gov.az portalı vasitəsilə qurmağa dəvət edir.