“Ərzaq məhsullarının tədarükü və təchizatı” qarşıya qoyulmuş məqsədlərin həyata keçirilməsi istiqamətində fəal tədbirlər həyata keçirir.

Yerli istehsalı gücləndirmək, idxalı əvəz edən məhsulların əkinin genişləndirilməsi məqsədi ilə fermerlərə hərtərəfli dəstək layihələri reallaşdırılmaqdadır. Çin Xalq Respublikasının dövlət koorporasiyası olan “YTO GROUP”la birgə Qusar rayonunda ev təsərrüfatları üçün kiçik ölçülü traktorların istehsalı üzrə memorondum imzalanıb. Memoronduma əsasən, ildə 800 ədəd traktor istehsal edilərək sərfəli lizinq qiymətləri ilə ev təsərrüfatlarına satılacaq.

Mədəni əkinçilik prinsiplərinin tətbiqi, hektardan götürülən məhsuldarlığın yüksəldilməsi məqsədi ilə Səhmdar Cəmiyyət Rusiyanın “Evroxim” şirkəti ilə əməkdaşlığa başlayıb. Bu əməkdaşlıq nəticəsində suda tez həll edilərək bitkinin vegetasiyasını sürətləndirən mineral gübrələrin əlverişli şərtlərlə fermer təsərrüfatlarının təminatına yönəldilməsi planlaşdırılır.

"Marja" xəbər verir ki, Səhmdar Cəmiyyəti ev təsərrüfatlarının növbəti inkişaf istiqaməti kimi müəyyən səbəblərə görə uzun illər ölkənin əkin struktrurundan çıxmış, lakin təlabat böyük olan dənli-paxlalı bitkilərin əkinin genişləndirilməsini həyata keçirir. Respublikanın bütün regionları üzrə verilmiş avans vəsaitinin böyük hissəsi dənli-paxlalı bitkilərin əkinin artırılmasına yönəldilib. Belə bitkilərdən biridə qarabaşaqdır.

Məlum olduğu kimi, qarabaşaq qida dəyəri yüksək, əhalinin istehlakında mühüm yer tutan bitkilərdən biridir. Aqrotexniki qulluğa qarşı tələbkar olmaması, münbit olmayan torpaqlarda belə asan yetişdirilməsi, sərt iqlim amillərinə qarşı dayanıqlığı bu bitkinin təsərrüfat əhəmiyyətini daha da artırır.

Respublikamızın bölgələrində uzun illər əkilmədiyi üçün hazırda qonşu ölkələrdən idxal edilir. Səhmdar Cəmiyyət yerli istehsalçılarda qarabaşaq əkininə marağı artırmaq üçün bu sahəyə avans məbləğinin verilməsini və istehsal olunan məhsulun fermerdən sərfəli qiymətə tədarük olunmasını həyata keçirir. İlk dəfə olaraq builki məhsul mövsümündə qarabaşaq əkinlərinə başlanıb. Belə ki, Kürdəmir rayonunda 50 hektar (gözlənilən məhsuldarlıq 125 ton), Qəbələ rayonunda 12 hektar (gözlənilən məhsuldarlıq 30 ton) və Bərdə rayonunda 1 hektar (gözlənilən məhsuldarlıq 2,5 ton) sahədə qarabaşaq əkini üçün istehsalçılara 39 min 348 manat avans verilib. Əkinlər optimal vaxtda başa çatdırılıb və hazırda sahələrdə aqrotexniki qaydalara uyğun bitiş əldə olunub. Sahələrdən əldə olunacaq proqnoz məhsuldarlıq 157,5 ton olacaq.

Səhmdar Cəmiyyətin “Monitorinq və mal dövriyyəsinə nəzarət” şöbəsinin müdiri Sahib Şükürov və regional bölmə əməkdaşları bu gün Qəbələ rayonu, Tüntül kənd sakini Elçin Baxışovun sahəsində olaraq bitkinin inkişaf fazasına baxış keçiriblər. Fermer 12 hektarda qarabaşaq əkini üçün 10 min 680 manat avans alıb. Bitkinin inkişafı, göstərilən aqrotexniki qulluq işlərinin səviyyəsi qənaətbəxş qiymətləndirilib.

Səhmdar Cəmiyyət bu ilki məhsul mövsümündə qarabaşaqla yanaşı, noxud, lobya, sarımsaq, kələm, yerkökü, kartof, kahı, çəltik və digər məhsullar da daxil olmaqla 39 məhsul növü üzrə 120 nəfər fermerə 2 milyon 712 min manat həcmində avans verib. Verilmiş avanslar üzrə tədarükün həcmi 25 min 526 ton təşkil edəcək.

 “Ərzaq məhsullarının tədarükü və təchizatı” Açıq Səhmdar Cəmiyyətinin əsas məqsədi kənd təsərrüfatı məhsullarının istehsalını və (və ya) emalını stimullaşdırmaq, kənd təsərrüfatı məhsulları istehsalçılarının inkişafını təmin etmək, regionlarda kənd təsərrüfatı ilə məşğul olan əhalinin sosial rifahının yaxşılaşdırılmasına zəmin yaratmaq, ərzaq məhsullarının keyfiyyətini, eləcə də dövlət vəsaitindən istifadənin səmərəliliyini artırmaq və dövlət sifarişi ilə ərzaq məhsullarının satın alınmasının mərkəzləşdirilmiş qaydada həyata keçirilməsini təmin etməkdən ibarətdir.