“Azərbaycan Respublikasında çəltikçiliyin inkişafına dair 2018-2025-ci illər üçün Dövlət Proqramı”nda nəzərdə tutulan hədəflərin həyata keçirilməsi üçün yeni məhsuldar çəltik sortlarının yaradılması, onların toxumçuluğunun təşkili, gübrə, pestisid, becərmə texnikaları ilə təminat, əkin sahələrinin genişləndirilməsi sahəsində Lənkəran rayonunda mühüm işlər görülüb.

Dövlət Proqramının icrası istiqamətində görülən işlər və dövlət səviyyəsində sahibkarlara yaradılan şərait çəltikçiliyə marağı xeyli artırıb. 

Lənkəranda çəltikçiliklə məşğul olan ən iri təsərrüfatlar “Green East” MMC, “Muğandüyü” MMC, “Cənub Aqro” MMC, “RUZ” MMC, “Faran” MMC və BETA firmasıdır.

Rayonda çəltikçiliyin inkişafı üçün geniş perspektivlər var. Xanbulançay su anbarının bu ərazidə yerləşməsi çəltik sahələrinin suvarılmasında mühüm rol oynayır.

Bu il yay mövsümündə havaların normadan artıq isti və quraq keçməsi məhsul istehsalçıları üçün bir sıra problemlər yaratsa da, çəltik sahələrinə düzgün aqrotexniki qulluğun göstərilməsi və suvarmanın növbəlilik əsasında təşkili nəticəsində məhsuldarlığa bir o qədər təsir etməyib.

2018-ci ildən ölkəmizin cənub bölgəsində fəaliyyətə başlayan “Muğandüyü” MMC-nin 385 hektar çəltik sahəsi var. Bunun ən çoxu - 330 hektarı Lənkəranda, 35 hektarı Astarada, 20 hektarı isə Biləsuvar rayonunda yerləşir.

MMC-nin baş aqronomu Rövşən Əliyevin verdiyi məlumata görə, indiyədək 300 hektar çəltik sahəsində məhsul yığımı başa çatıb. Sahələrdən 1000 ton çəltik biçilib. Hər hektardan götürülən məhsuldarlıq 36,1 sentner təşkil edib.

Havaların yağmurlu keçməsi səbəbindən müəssisənin Lənkəranda olan 65 hektar sahəsində biçin aparılmayıb.

Bu il müəssisənin çəltik sahələrindən ümumilikdə 1300 ton məhsulun istehsal edilməsi nəzərdə tutulub.

Çəltik əkini ilə bağlı “Muğandüyü” MMC-nin nəzdində toxumçuluq təsərrüfatının yaradıldığını deyən baş aqronom, yerli fermerlərin də çəltik toxumu ilə təmin edildiyini diqqətə çatdırıb. Müəssisənin sahələrində əsasən “Haşımi”, “Sədri”, “Avanqard”, “Apolla” və “Luna” çəltik növləri əkilib.

İstehsal olunan məhsullar “Astaradüyü” brendi adı ilə Bakı, Lənkəran və Astara rayonlarındakı satış mərkəzlərində bazara çıxarılır. Düyünün bir kiloqramının qiyməti növünə görə 1,80 - 4,20 manat arasındadır.

Pandemiya səbəbindən satışda çətinliklərlə üzləşdiklərini vurğulayan Rövşən Əliyev bildirib ki, bununla bağlı daha çox dəstəyə ehtiyac duyulur. O, həmçinin çəltik istehsalçılarının elit toxumlarla təmin edilməsinin, çəltikçiliklə bağlı ixtisaslaşdırılmış texnikaların əhatə dairəsinin genişləndirilməsinin vacibliyini də diqqətə çatdırıb.

Çəltikçilik çox gəlirli sahədir. Hər hektardan 50-60 sentner məhsul götürməklə düyü maya dəyərindən 10-15 dəfə baha satılır. Ekoloji cəhətdən təmiz və keyfiyyətli olduğu üçün bazarda yerli düyüyə tələbat böyükdür.

Qeyd edək ki, Bu il Lənkəran rayonunda 830,18 hektar sahədə çəltik əkilib. İndiyədək 535 hektar sahənin məhsulu yığılıb. Çəltik sahələrinin hər hektarından götürülən məhsuldarlıq 35 sentnerdir.

Rayonda çəltik yığımı kampaniyası davam edir.

Telegramda Marja.az səhifəsinə abunə olun

Azərtac