17:20 -Avtomobil vasitəsilə gediş sifariş etmək üçün eyniadlı onlayn xidmətin yaradıcısı olan Uber beynəlxalq texnologiya şirkəti bu gün yeni “Çatdırılma” xidmətini (“Delivery”) işə salıb.

Xidməti nağd pulla və ya proqram ilə əlaqələndirilmiş bank kartlı ilə ödəmək mümkündür. Xidmətin minimal dəyəri 2 manat təşkil edir — bu qiymətə ilk 5 dəqiqə və 3,5 kilometrlik gediş daxildir. Məsələn, "28 Mall" ticarət mərkəzindən Nəriman Nərimanov metrosuna çatdırılma, təxminən, 2,5 manata başa gələcək. 

Uber şirkətinin Azərbaycandakı nümayəndəsi Müşfiq Həsənov bildirib: “Yeni xidmət Bakı sakinlərinə çatdırılma ehtiyacı duyulan gündəlik məsələlərini daha tez həll etməyə yardım edəcək. Bu xidmət vasitəsilə həm yaxın insanlara müxtəlif əşyalar, həm də biznes partnyorlarına sənədlər, yaxud müştərilərə sifarişlər göndərmək mümkündür. Onu da qeyd edək ki, biz onu istifadəçilər üçün əlçatan etməyə və eyni zamanda xidmətin partnyor sürücülərinə  daha çox sifariş təklif etməyə çalışırıq".

Əşyaları göndərmək üçün istifadəçi əvvəlcə onları qablaşdırmalı, avtomobilə çatdırmalı və avtokuryerə təhvil verməlidir. Bağlamanın çəkisi 20 kiloqramdan artıq olmamalıdır. Avtomobil gəldiyi zaman qəbuledən əşyanı götürmək üçün ona yaxınlaşmalıdır. Onlayn xidmətdə, həmçinin 2 manat əlavə ödəməklə "qapıdan qapıya" çatdırılma seçimi də nəzərdə tutulub, yəni avtokuryer bağlamanı mənzilin və ya ofisin qapısından götürəcək və qəbuledənə təhvil verəcək.

"Uber Azerbaijan" proqramında “Çatdırılma” xidmətini seçdikdən sonra istifadəçi həm göndərənin, həm də qəbuledənin ünvanını və əlaqə nömrəsini qeyd edir. Əlavə olaraq "Gedişi paylaş" funksiyası da mövcuddur. Onun köməyilə qəbuledənin avtomobilin marşrut üzrə hərəkətini izləyə biləcəyi keçid yaradılır.

Qeyd edək ki, Uber fərdi sürücü ilə avtomobillərin sifarişi üzrə xidmət təklif edən eyniadlı mobil proqramın yaradıcısı olan beynəlxalq texnologiya şirkətidir. Uber-in əsas missiyası şəhərdaxili gedişləri ən müasir standartlara cavab verəcək şəkildə bütün sakinlər üçün sadə, etibarlı və əlçatan etməkdir.

XXX

13: 45 -"Uber" beynəlxalq texnologiya şirkəti Bakıda çatdırılma xidmətini (“Delivery”) istifadəyə verib.

Marja xəbər verir ki, xidmət üçün nağd və ya tətbiqə bağlı bir kartla ödəniş mümkündür. Kuryer xidmətinin minimum qiyməti 2 manatdır 

"Uber"in Azərbaycandakı nümayəndəsi Müşviq Həsənov bildirib ki, yeni xidmət ilə əşyaları və ya sənədləri qohumlara, iş ortaqlarına və ya müştərilərə göndərə bilərsiniz. 

Bir şeyi göndərmək üçün istifadəçi əvvəlcə onları qablaşdırmalı, avtomobilə aparmalı və kuryerə təhvil verməlidir. Paketin 20 kiloqramdan ağır olmaması vacibdir. Yeni xidmət qapıdan qapıya seçim imkanı da təqdim edir, bunun üçün əlavə 2 manat ödəniş edilməlidir.