Çinin süni intellekt şirkəti “DeepSeek” son maliyyələşmə raundunun həcmini ilkin hədəflə müqayisədə iki dəfə artıraraq 100 milyard yuana, yəni təxminən 14,9 milyard dollara çatdırmağı nəzərdən keçirir. Dövlət dəstəkli fondlar və korporativ investorlar şirkətdə pay əldə etmək üçün fəal maraq göstərirlər.

Marja xəbər verir ki, məsələ ilə tanış olan və danışıqların məxfi olması səbəbindən adlarının açıqlanmasını istəməyən iki mənbənin CNBC-yə bildirdiyinə görə, “DeepSeek” dövlət dəstəkli fondlardan, Çinin birjada listinqdə olan şirkətlərinin investisiya bölmələrindən və vençur kapitalı fondlarından güclü maraq görür.

Bununla belə, şirkət potensial investorları ciddi şəkildə yoxlayır. Mənbələrin sözlərinə görə, ayrı-ayrı şəxslərin vəsaitləri hesabına formalaşdırılan özəl investisiya fondlarının təklifləri rədd edilir və investor dairəsi əsasən dövlət və korporativ fondlarla məhdudlaşdırılır.

Bu il ilk dəfə xarici investor kapitalı cəlb etməyə başlayan “DeepSeek” cari maliyyələşmə raundu üçün əvvəlcə 50 milyard yuan hədəf müəyyən etmişdi.

Danışıqlar hələ davam edir və yekun məbləğ dəyişə bilər.

“Bloomberg” çərşənbə axşamı bildirib ki, “DeepSeek” ən azı 80 milyard yuan maliyyələşmə cəlb etməyə yaxındır. “Tencent” və akkumulyator istehsalçısı “CATL”ın ən böyük investorlar arasında olduğu bildirilir. Şirkətin həmçinin 2027-ci ilin əvvəlində ilkin kütləvi səhm təklifi – IPO keçirməyi nəzərdən keçirdiyi qeyd olunur.

Mənbələrdən birinin CNBC-yə verdiyi məlumata görə, “CATL”, “Geely Auto”, “Monolith Management” və “Loyal Valley Capital” son maliyyələşmə raunduna kapital yatırmaq öhdəliyi götürüblər.

“DeepSeek”, “CATL”, “Geely Auto”, “Monolith Management” və “Loyal Valley Capital” CNBC-nin şərh sorğularına cavab verməyiblər.

Maliyyələşmə raundunun ilkin olaraq avqustun sonuna qədər tamamlanması gözlənilsə də, bəzi potensial investorların qiymətləndirmə ilə bağlı tərəddüd etməsi prosesi uzadıb. Mənbələr danışıqların artıq yekun mərhələyə yaxınlaşdığını bildirirlər.

“DeepSeek” şirkətin dəyərinin təxminən 500 milyard yuan və ya 75 milyard dollar səviyyəsində qiymətləndirilməsini istəyir.

Şirkətin iyun ayında başa çatan ilk xarici maliyyələşmə raundunda təxminən 50 milyard yuan cəlb olunub. Həmin raundla bağlı investor sənədləri şirkətin təxminən 350 milyard yuan dəyərində qiymətləndirildiyini göstərirdi.

Laboratoriyadan birjaya

“DeepSeek” 2025-ci ilin yanvarında ABŞ şirkətlərinin modelləri ilə rəqabət apara bilən, lakin daha aşağı xərclə hazırlanmış süni intellekt modellərini təqdim etdikdən sonra ABŞ texnologiya səhmlərində kəskin satış dalğasına səbəb olmuşdu.

Şirkətin sentyabrda təqdim etdiyi son modeli – V4.1 Flash – daha yüksək performans və daha sürətli nəticə əldə etmək üçün hazırlanıb.

“DeepSeek”in xarici kapitala açılması süni intellekt sektorunda maliyyə ehtiyacının sürətlə artmasının və güclənən rəqabət şəraitində yüksək ixtisaslı mütəxəssisləri şirkətdə saxlamaq təzyiqinin göstəricisi kimi qiymətləndirilir.

Şirkətin təsisçisi Liang Wenfeng iyul ayında investorlarla keçirdiyi qapalı görüşdə mənfəəti maksimumlaşdırmaqdan daha çox texnologiyanı ümumi süni intellektə – AGI-yə yaxınlaşdırmağa üstünlük verdiyini bildirib.

Mövcud maliyyələşmə raundu üzrə danışıqlar Liangın Çin süni intellekt şirkətlərinin hələ də ABŞ-dakı rəqiblərindən xeyli geri qaldığını və “Nvidia” çiplərindən ciddi şəkildə asılı olduğunu bildirməsindən sonra qısa müddətə dayandırılmışdı.

Sentyabr ayında “Reuters” yazmışdı ki, “DeepSeek” Şanxay Fond Birjasının STAR Market platformasında mümkün IPO-ya hazırlıq məqsədilə “CITIC Securities”i prosesə cəlb edib.

Şirkətin Çindəki rəqibi “Moonshot AI”ın da 50 milyard dollarlıq qiymətləndirmə ilə maliyyə cəlb etdikdən sonra 2027-ci ilin əvvəlində IPO keçirməyi planlaşdırdığı bildirilir.

Hər gün yeni vakansiyalar - AzVak.az-da