Avtomobil istehsalçılarının başı dərddən açılmır: pandemiya, çip böhranı, “nasaz milyardlar”

Avtomobil istehsalçılarının başı dərddən açılmır: pandemiya, çip böhranı, “nasaz milyardlar”

Təkcə geri çağırılan elektromobillər 2 milyarddan artıq ziyan vurub....

Avtomobil istehsalçılarının başı dərddən açılmır: pandemiya, çip böhranı, “nasaz milyardlar”

Hazırda qlobal avtomobil bazarı özünün ən çətin günlərini yaşayır - həm pandemiya səbəbindən “çip böhranı”, həm də elektrikli avtomobillərlə bağlı çətinliklər iri şirkətləri sıxır.

Marjanın dünən xəbər verdiyi kimi, ən iri qlobal istehsalçı olan Toyota sentyabr ayında istehsal həcmini 40% azaldacağını açıqlayıb (900 min avtomobil əvəzinə 540 min ədəd). Əsas səbəb yarımkeçirici çiplərin və digər ehtiyat hissələrinin çatışmazlığıdır. Çünki ən iri təchizat zavodlarının yerləşdiyi Malayziya və Vyetnamda son həftələrdə koronavirus infeksiyasının kütləvi yayılması iqtisadiyyatı iflic edib.

Digər bir avtomobil nəhəngi - Ford avqustun 23-dən başlayaraq, ABŞ-ın Missuri ştatındakı F-150 pikaplarının yığılma xəttində işləri dayandırır. Çin istehsalçısı Geely də bu həftə “təchizatdakı qeyri-müəyyənliyin davam etdiyini” bildirib. Ötən ay isə Jaguar Land Rover çip böhranına görə satış proqnozunu yarıbayarı azaldıb.

Lakin avtomobil istehsalçılarının problemi təkcə bununla bitmir. Hazırda əksər ölkələrin, o cümlədən ABŞ və Avropa İttifaqının yeni hədəfi - 2030-cu ilə qədər avtomobil parkının yarısını elektrikləşdirmək ənənəvi nəhəngləri rəqabət yarışında çətin vəziyyətə salıb: milyardlarla vəsait yatırırlar, lakin hələ də yanğın, mühərrik nasazlığı və batareyanın düzgün işləməməsi kimi ciddi problemlər bitmir.

Ötən il 3 qlobal istehsalçı - General Motors, Hyundai və Ford 132 mindən çox elektrikli avtomobili geri çağırmalı olub. Bu isə həmin şirkətlərə 2,2 milyard dollara başa gəlib. Ən çox ziyan çəkən General Motorsdur - 800 milyon dollar.

Elektromobil bazarının lideri Tesla batareya problemini əsasən həll etsə də, digər texniki nasazlıqlara görə hazırda ABŞ və Norveçdə şirkətin bir sıra modelləri ilə bağlı qəzalar əsaslı araşdırılır. Bu da Elon Maskın şirkətinə təsirsiz ötüşməyəcək.

çip böhranı avtomobil bazarı Toyota General Motors Hyundai Ford elektrikli avtomobil

20.08.2021 06:54

📲 İndi
Marja.az-ın WhatsApp kanalına qoşulun və xəbərlər cibinizə gəlsin.

♦️ Ən son və vacib iqtisadi xəbərlər üçün Marja - Biznes və Maliyyə Xəbərləri Portalı
♦️ Ən mühüm xəbərlər üçün Marja.az