(®️) Ölkənin aparıcı korporativ maliyyə institutu “PAŞA Bank” və Azərbaycan-Fransa Ticarət və Sənaye Palatasının birgə təşəbbüsü ilə “Kiçik və orta sahibkarlar üçün maliyyə çıxışı” mövzusuna həsr edilən konfrans keçirilib.

İyun ayının 22-də “JW Marriott Absheron” mehmanxanasında baş tutan tədbir zamanı KOS-ların biznes fəaliyyətlərində üzləşdiyi çətinliklərin, onların maliyyə çıxışını asanlaşdırmaq üçün təqdim edilən yeni maliyyələşmə növlərinin və müxtəlif şirkətlərin bu sahə üzrə irəli sürdüyü layihələrin müzakirəsi yer alıb.

Tədbirdə açılış nitqi ilə çıxış edən “PAŞA Bank”ın İdarə Heyətinin sədri Taleh Kazımov, KOS seqmentindən və onların iqtisadiyyatdakı əhəmiyyətli rolundan danışıb. O, həm geridə qalan üç illik strateji dövrdə, həm də 2021-2023-cü illər üçün nəzərdə tutulan İnkişaf Strategiyasında Bankın əsas diqqətinin KOS-ların maliyyələşməsinin təmin edilməsinə yönəldildiyini vurğulayıb.

“Önümüzdəki əsas çağırış KOS-ların maliyyələşmə metodlarının şaxələndirilməsidir. Ölkəmizə daha çox investisiya cəlb olunmasına yardım etməklə, xarici investorlarla yerli bizneslər, dövlət tənzimləyiciləri ilə sahibkarlıq subyektləri arasında əlaqələndirici olmaqla bu çağırışın öhdəsindən gələ biləcəyik”, - deyə Taleh Kazımov bildirib.

Azərbaycan-Fransa Ticarət və Sənaye Palatasının İdarə Heyətinin sədri Teybə Quliyeva salamlama nitqində KOS-ların maliyyə resurslarına çıxışını məhdudlaşdıran əngəllərin aradan qaldırılması üçün dövlət-özəl sektor tərəfdaşlığının vacibliyini vurğulayıb və bu kimi tədbirlərin ikitərəfli dialoqun dərinləşməsində mühüm əhəmiyyətə malik olduğunu qeyd edib.

Konfransda həmçinin dövlət qurumlarının, beynəlxalq təşkilatların nümayəndələrinin, yerli və xarici ekspertlərin mövzuya dair çıxışları və təqdimatları nümayiş olunub. Sonda keçirilən sual-cavab sessiyası zamanı iştirakçıları maraqlandıran suallar cavablandırılıb.

Xatırladaq ki, “PAŞA Bank”, bundan öncə də KOS-lara həsr olunan bir sıra tədbirlərin təşkilatçısı və sponsoru qismində yer alıb. Bank tərəfindən sosial təcrid dönəmlərində pandemiyanın mənfi təsirindən daha çox zərərçəkmiş sahələrdə fəaliyyət göstərən KOS-larla onlayn görüşlər təşkil olunub və onlara konsultasiya dəstəyi göstərilib.