ABŞ istiqrazlarından təzadlı göstərici

ABŞ istiqrazlarından təzadlı göstərici

Açıqlanacaq yeni işsizlik və digər statistik məlumatları gözləyən birjalarda vəziyyət qarışıqdır.

İnvestorların diqqəti bugün və sabah açıqlanacaq bəzi iqtisadi göstəricilərə yönəldiyi bir vaxtda ABŞ-da dövlət istiqrazları səhər sessiyasında qarışıq nəticələr göstərib.

Marja xəbər verir ki, 10 illik Xəzinədarlıq notlarının gəlirlilik dərəcəsi 10 bənd artaraq, 1,5926%-ə çatıb. 30 illik notlarda isə əksinə - azalma müşahidə olunub. Gəlirlilik dərəcəsi 11 baza bəndi azalaraq, 2,2774%-ə düşüb. Göstəricilər qiymətlərə tərs mütənasib olaraq dəyişib.

Hazırda ABŞ investorları inflyasiya dinamikasını ciddi şəkildə izləyirlər. Mərkəzi Bankın (Fed) Nyu-York bölməsinin keçmiş rəhbəri Uilyam Dudley dünən CNBC televiziyasında açıqlamasında hazırkı Fed rəhbərliyi ilə eyni mövqedən çıxış edərək, inflyasiya artımının müvəqqəti xarakter daşıdığını bildirib.

Dünən Fed-in 12 əyalətdə iqtisadi aktivlik və bazar şəraiti barədə mütəmadi açıqladığı icmalın - “Bej rəngli kitabın (Beige Book)” aprel-may ayları üzrə nəticələri də maraqlı olub. Hazırda milli səviyyədə işsizlik faizi 6,1% təşkil edir, 9,8 milyon işsizin və 8 milyon boş iş yerinin mövcudluğuna baxmayaraq, şirkətlər yetərincə əməkdaş tapmaqda çətinlik çəkir. Bu isə əmək haqqı xərclərini artırır və şirkətər yeni işçilərə daha yüksək məvacib vəd etməli olur.

Bugün həm də qeyri-kənd təsərrüfatındakı işçilərin sayı və həftə ərzində işsizlik müavinəti üzrə təqdim olunan ərizələrin miqdarı barədə məlumatlar açıqlanacaq. Fed-in Atlanta bölməsinin rəhbəri Rafael Bostikin və Dallas filialının prezidenti Robet Kaplanın çıxışları da maraqla gözlənilir.

03.06.2021 11:31

📲 İndi
Marja.az-ın WhatsApp kanalına qoşulun və xəbərlər cibinizə gəlsin.

♦️ Ən son və vacib iqtisadi xəbərlər üçün Marja - Biznes və Maliyyə Xəbərləri Portalı
♦️ Ən mühüm xəbərlər üçün Marja.az