Koronavirus pandemiyası bir sıra sahələrdə ciddi resessiya yaratsa da, xüsusən tibbi xidmətlər və əczaçılıq sahələrində görünməmiş inkişaf bumuna səbəb oldu.

Marja xəbər verir ki, bu kiçik “taclı” virusun yaratdığı fürsətlərdən maksimum faydalananlardan biri də Çinli iş adamı, qəribə bir təsadüflə elə COVID-10 infeksiyasının dünyaya yayıldığı Vuhan şəhərində anadan olmuş milyoner Çarlz Huanqdır. ÜST tərəfindən infeksiya pandemiya olaraq elan edilən kimi, özəl investisiya şirkəti Pasaca Capital-ın sahibi olan Çinli bu fürsəti əldən verməyərək, 2020-ci ilin martında ABŞ-da Innova Medical Group şirkətini qurur.

Əvvəlcə standart COVID testləri istehsal edən şirkət daha sonra yeni innovativ məhsulunu - cəmi 5 dollardan da ucuz olan və 30 dəqiqə ərzində nəticəni göstərən testləri təqdim etdi. Tezliklə bu məhsullara ABŞ və Avropada tələbat görünməmiş dərəcədə artıb. Ötən ilin sonlarından sürətli COVID test dəstinin istehsalı ilə bağlı təkcə Böyük Britaniya hökuməti ilə 3 milyard funt-sterlinq (4,25 milyard dollar) həcmində təchizat müqaviləsi imzalanıb. Bu, hökumətin elan etdiyi 37 milyard funtluq Test və İzləmə proqramı çərçivəsində bir şirkətə verilmiş ən böyük sifarişdir.

İndiyə kimi müqavilə çərçivəsində Innova Böyük Britaniyanı Çinin Fujian əyalətində istehsal olunmuş 1 milyard ədəd testlə təchiz edib. Şirkət təkcə bu testlərin ölkəyə gətirilməsinə 100 milyon funtdan artıq vəsait xərcləyib. 2020-ci ilin ikinci yarısında isə Pasaca Capital test istehsalına 100 milyonlarla dollar investisiya yatırıb.

Bəzi ölkələr tərəfidən testlərinin dəqiqliyi ilə bağlı çoxlu sual və iradlar bildirilsə də, Innova öz hədəflərindən vaz keçmək fikrində deyil. Şirkət gündəlik COVID test istehsalını 10 dəfə - 5 milyondan 50 milyona qədər artırmaq üçün bu yay Uelsdə iri istehsal müəssisi açacağını bildirib. Şirkətin baş direktoru Den Elliot hələ ən azı 3-4 il COVID testlərinə tələbatın yüksək səviyyədə qalacağına əmindir: “Nə qədər ki biz işləyirik, səyahət edirik, o qədər çox test üçün qarışıq variantlar və imkanlar mövcud olacaq”.