Geridə qoyduğumuz həftə bir sıra aktivlər üçün maraqlı və çətin dövr kimi yadda qalıb. Xüsusən Bitcoin üçün ötən həftə əsl “cəhənnəm” yaşanıb.

Marja xəbər verir ki, əvvəlki həftədə qalmaqallı Tesla şefi Elon Maskın ekoloji problemləri önə çəkərək, Bitcoin-dən ödəniş vasitəsi kimi istifadə etməyi dayandıarcaqları barədə Tviti, daha sonra ötən həftə Çin rəsmilərinin bank və maliyyə təşkilatlarına rəqəmsal valyutalardan istifadənin dayandırılması barədə xəbərdarlığı kriptovalyuta  bazarının liderini çökdürüb.

Həftənin ortasında 30% dəyər itirərək, il ərzində ikindi dəfə 40 min dollardan aşağı düşən Bitcoin Elon Maskın əllərindəki kriptovalyuta ehtiyatlarının satmadıqları barədə xəbərindən sonra nisbətən özünə gəlməyə başlayıb. Lakin ABŞ Mərkəzi Bankının (Fed) və Daxili Gəlirlər Xidmətinin kiptovalyuta əməliyyatları üçün yeni qaydalar tətbiq etməsi və müəyyən limitdən sonrakı sövdələşmələrin vergitutmaya cəlb olunacağı barədə xəbərlər həftəsonu Bitcoin -ə daha bir ucuzlaşma şoku yaşadıb. Şənbə-bazar sessiyasında 13%-dən artıq ucuzlaşan 1 nömrəli kriptovalyutanın dəyəri 31 min dollara qədər azalıb. Ucuzlaşma Ether, Dogecoin və digər kriptovalyutalara da təsir edib. Bütün bunlara baxmayaraq, yenə də ilin əvvəlindən Bitkoin təxminən 284%, Ether isə rekord həddə - 800%-dən artıq dəyər qazanıb.  

İnvestorların ənənəvi sevimlisi, kapital ehtiyatlarında ən vacib element olan qızıl isə həftə ərzində sürətli artım tempi götürüb. Bir neçə aydır digər daha az qiymətli metalların (mis, dəmir, gümüş) bahalaşması fonunda qiyməti sabit qalan, hətta mart ayında son 8 aylıq dövrün ən aşağı həddinə (1707 dollar/unsiya) düşən qızıl ötən həftə əvvəlki dəyərini bərpa etməyə başlayıb. Həftəsonu 1 unsiyaya görə 1887 dollara çatan qızılın qiymətindəki bu artım son 4 ayın ən yüksək göstəricisidir.

Adətən investorlar qızıldan inflyasiyaya qarşı hedc aləti kimi də istifadə edir. ABŞ və bir sıra digər inkişaf etmiş ölkələrdə iqtisadiyyatın bərpası və inflyasiyanın yüksəlməsi qızıla tələbatın da artacağından xəbər verir. Daha çox bəzi şəxslərin açıqlamalarına daha həssas olan Bitcoin və onu izləyən digər kriptovalyutaların aqibəti isə növbəti həftələrdə aydın olacaq.