ABŞ hökuməti pandemiyadan ziyan çəkən insanlara yardım üçün hər ev təsərrüfatına 1400 dollarlıq yardımların ödənilməsinə hazırlaşır.

Marja xəbər verir ki, ötən həftə Senatda qəbul edilmiş 1.9 trilyon dollarlıq yeni iqtisadi yardım tədbirləri paketinin bu həftə ABŞ Konqresinin Nümayəndələr Palatası tərəfindən təsdiqlənəcəyi və Prezident Bayden tərəfindən imzalanacağı gözlənilir. 2020-ci ilin mart-aprelində Tramp administrasiyası dövründə həftələrlə uzanan təsdiq prosesindən fərqli olaraq, Demokratların hakimiyyəti prosesi daha tez yekunlaşdırmaq niyyətindədir.

Həbsdə olan şəxslər, həyat yoldaşları ABŞ vətəndaşları olmayanlar və 2020-ci ildə yaxın qohumları vəfat etmiş şəxslər də bu yardım proqramından faydalana biləcək. Qanun layihəsinə həmçinin hər uşağa görə 3000 dollara qədər vergi güzəşti, yaxud altı yaşı tamam olmamış hər uşaq üçün 3600 dollarlıq yardım paketi də daxildir. ABŞ-ın Daxili Gəlirlər Xidməti bu məbləği aylıq 250-300 dollarlıq hissələrlə dekabr ayına kimi uşaqlı ailələrə ödəyəcəkdir, bu isə adətən gəlirləri toplamaqla məşğul olan qurum üçün yeni – yardımları bölüşdürmək funksiyası deməkdir.

ABŞ Maliyyə Nazirliyinin sözçüsü Bayden administrasiyasının əsas prioritetinin Amerikanlara mümkün qədər sürətli yardım etmək olduğunu vurğulayaraq açıqlamasında qeyd etmişdir: “Maliyyə Nazirliyi Amerikanların Xilas Planı qəbul olunan kimi, onun dərhal icrasına başlamağa hazırdır”.

Müqayisə üçün bildirək ki, ötən il prezident Donald Tramp 2.3 trilyon dollarlıq Koronavirus Yardımı, Kompensasiya və İqtisadi Təhlükəsizlik Aktını (CARES aktı) Konqresdə uzun sürən müzakirələrdən və təsdiqdən sonra martın sonlarında imzalamış, Daxili Gəlirlər Xidməti isə bundan yanız iki həftə sonra ödənişləri etməyə başlamışdı. Tramp 2020-ci ilin sonunda-dekabrın 27-də yeni əlavə 900 milyard dollarlıq stumulaşdırma paketini imzalamış və ödənişlər 2 gün sonra həyata keçirilməyə başlamışdır.

Bayden administrasiyasının təqdim etdiyi yeni Qanun layihəsi koronavirus pandemiyası başlayandan bəri ABŞ-da tətbiq olunan sayca üçüncü iri həcmli iqtisadi yardım və tədbirlər paketidir. Yeni paket əvvəlkilərdən fərqli olaraq uşaqlar üçün vergi güzəştlərini 2000 dollardan 3000 dollara qədər artırır və illik 75 000 dollardan aşağı gəliri olan hər bir valideyn üçün 6 yaşdan 17 yaşa qədər uşaqlara görə bu ödənişləri almaq hüququ verir.

Həmçinin oxu:

"Dünyanın ən bahalı dərmanı"

"Texnologiya nəhənglərindən 14 milyard dollarlıq sövdələşmələr"

"Asiyanın “mini Amazon”u səhm bazarına çıxır"

"Sənaye nəhəngi biznesinin bir hissəsini satır - 30 MİLYARD DOLLARLIQ SÖVDƏLƏŞMƏ"

"1 milyonluq əskinas!"

"Apple irimiqyaslı cərimələr ilə üz-üzə!"

"Pandemiya çatdırılma şirkətlərinin bazar dəyərini artırıb"