Xaçmaz rayonunun Çarxı kəndində fəaliyyət göstərən müəssisədə il ərzində 20-25 ton yeməli göbələk növlərindən olan şampinyon yetişdirilir.

Müəssisədə istehsal olunan məhsul Xaçmazla yanaşı, Quba, Qusar və Sumqayıtda da satışa çıxarılır.

Sahibkar Ənvər Haqverdiyev bildirib ki, müəssisədə göbələyin yetişdirilməsi üçün ən vacib elementlərdən sayılan xüsusi qarışıq - kompost hazırlanır. Bu qarışığın hazırlanması üçün saman, üzvi və qeyri-üzvi gübrələrdən istifadə edilir. Kompostun hazırlanması prosesi 15-20 gün çəkir. Bundan sonra kompost selofan torbalara doldurulur və Rusiyadan gətirilmiş, göbələk sporları yayılan toxumlar qarışıqda basdırılır. Göbələyin yetişdirilməsi və hazır məhsulun toplanması xüsusi istehsalat otaqlarında həyata keçirilir. Son məhsul həmin sexlərdə toplanaraq satışa çıxarılır.

Ənvər Haqverdiyev qeyd edib ki, müəssisəni beş ildir qurublar. İlk illərdə gəlir əldə etmək mümkün olmasa da, indi müəssisə qazanc gətirir. Göbələk əkildikdən sonra bir ay ərzində 3 dəfə məhsul toplanılır. 300 kvadratmetr sahədən 5 tona yaxın göbələk yığılır. Hər il 4-5 dəfə göbələk yetişdirilməsini həyata keçirən sahibkar, ümumilikdə, 20-25 ton məhsul götürür.

Çarxı kəndindəki müəssisədə yetişdirlən göbələyin topdansatış qiyməti 3 manatdır. Qablaşdırılmış halda isə 500 qram məhsul 2 manata satılır.

Gələcəkdə müəssisədə yeni istehsalat otaqlarının yaradılması və məhsul istehsalının artırılması nəzərdə tutulub.

Qeyd edək ki, şampinyon göbələyinin 200-dən çox növü var. Onların yalnız bir neçə növü yeyilmir. Hazırda dünyada yetişdirilən ümumi göbələk istehsalının 60-75 faizi şampinyonun payına düşür. Bu göbələklərin əsas istehsalçısı və ixracatçısı ABŞ-dır. Şampinyon göbələyi vitamin və minerallarla zəngin olduğundan faydalı ərzaq məhsulu sayılır. Tərkibində B qrupu vitaminləri bol olan bu məhsul yaddaşın möhkəmlənməsinə müsbət təsir göstərir, insanın zehni fəaliyyətini aktivləşdirir.

Azərtac