Bir neçə il əvvəl cənub bölgəsində əkininə başlanan sitrus meyvəsi olan hallabonqun yığımına start verilib. Portoğal və naringinin hibridi olan bu sitrus meyvəsi görünüşü, dadı, ətri və məhsuldarlığına görə digər sitrus meyvələrindən fərqlənir.

Cənubi Koreyadan gətirilmiş hollabonq meyvəsi Lənkəranda artıq 5 ildir yetişdirilir. İkinci ildən məhsul verməyə başlayan meyvə qış fəslində dərilir. İlk dəfə Sütəmurdov kəndi ərazisində 15 hektar sahədə əkilən tinglərdən ürəkaçan nəticə əldə olunduğundan meyvə bağları ilbəil genişləndirilərək 78 hektara çatdırılıb. Hazırda bağlarda meyvə yığılır.

Təsərrüfatın baş nəzarətçisi Rahab Əmirli ilə söhbət zamanı deyib ki, Vel kəndi ərazisində isə 5 hektar sahədə bağ salınıb: “Hazırda bağda meyvə dəririk. Bu günə kimi isə 10 tona yaxın hallabonq yığmışıq. Digər bağlarla birlikdə 40-50 ton məhsul toplamağı nəzərdə tuturuq”.

Xoş ətrə, dada malik hallabonqdan qənnadı, kosmetika, ətriyyat sahələrində geniş istifadə olunur. Hər birinin çəkisi 350-400, bəzən 500 qram olan meyvənin qiyməti irili-xırdalığından asılı olaraq kiloqramı 2 manat-2 manat 50 qəpik arasında dəyişir. Bağlarda naringi, portağal qurtardıqdan xeyli sonra, yəni bazarlarda sitrus meyvələrinə ehtiyac olan dövrdə yetişir. Digər üstünlüyü isə zərərvericilərə və şaxtaya dözümlü olmasıdır.

Aqronom Xaliq Talıbovun sözlərinə görə, bu meyvə yanvarın sonu, fevralın əvvəli tam yetişir. “3-4 dərəcə şaxtaya dözümlüdür, çox sağlam meyvədir. Bu gecə də şaxta olub, görürsünüz, heç bir ziyan vurmayıb. Hallabonqun üstünlüyü xəstəliklər və zərərvericilərə qarşı çox davamlı olmasıdır. Ağaclara vaxtında qulluq göstərilir. Bunun üçün meyvə bağlarımızda məhsuldarlıq boldur”, - deyə o qeyd edib.

İl boyu böyük zəhmət və qulluq tələb edən hallabonq bağlarında 100-150 nəfər işçi çalışır. Bu da ərazidə və ətraf kəndlərdə yaşayan əhalinin məşğulluğunun təmini baxımından əhəmiyyətlidir. Hazırda Lənkəranın Sütəmurdov, Şürük, Vel, Siyavar, Tükəvilə kəndlərində yetişdirilən hallabonq bağlarının daha da genişləndirilməsi nəzərdə tutulub.

Azərtac