Məhdudiyyətə və Dövlət Turizm Agentliynin xəbərdarlıqlarına baxmayaraq regoinlarda yerləşən bir sıra hotellər Yeni il gecəsi üçün qonaq qəbul etməyi və əyləncə tədbiri təşkil etməyi planlaşdırırlar. 

Marja xəbər verir ki, otellər turuzim şirkətləri vasitəsilə öz təkliflərini edirlər. 

"GREENWICH Travel Club"ın yaydığı məlumata görə, 31.12.20 - 03.01.2021 tarixlərində bir nəfərin 2 nəfərlik otaqda qalma qiymətləri hoteldən asılı olaraq 268 - 750 manat civarındadır. Bu qiymətlərə Yeni il axşamı musiqili-əyləncəli tədbirdə iştirak da daxildir.

XƏBƏRDARLIQ EDİLMİŞDİ

Dövlət Turizm Agentliyi Azərbaycan Respublikası Nazirlər Kabinetinin müvafiq qərarını rəhbər tutaraq bildirmişdi ki, hotellərdə bayramlarla əlaqədar kütləvi tədbir, şənlik və konsert proqramlarının təşkil edilməsi qadağandır.

Ölkə vətəndaşlarının Bakıda və ya regionlarda yerləşən hotellərdə keçirilən bayram tədbirlərində iştirakla bağlı hər hansı elan və dəvətlərə aldanmamaları, xüsusi karantin rejimi qaydalarına əməl etmələri zəruridir.

Xüsusi karantin rejimi dövründə bu növ faktlar aşkarlanacağı təqdirdə müvafiq dövlət qurumları tərəfindən qarşısı alınacaq, təşkilatçılar və iştirakçılar qanunvericiliyə uyğun olaraq məsuliyyətə cəlb olunacaqlar.

ARTIQ QƏBƏLƏYƏ İSTİRAHƏTƏ GƏLƏNLƏR MƏSULİYYƏTƏ CƏLB EDİLİB

Qəbələ Rayon Polis Şöbəsinin əməkdaşları tərəfindən rayon ərazisində keçirilən reyd zamanı Bakı şəhərindən, eləcə də sərtləşdirilmiş karantin rejimi elan edilən şəhər və rayonlardan qaydaları pozaraq istirahət məqsədilə rayona gələn şəxslər inzibati məsuliyyətə cəlb olunublar.

DİN-in Mətbuat Xidmətindən verilən xəbərə görə, şəhər ərazisində, istirahət mərkəzlərinə gedən yollarda avtomobillər yoxlanış məqsədilə polislər tərəfindən saxlanılıb. Yoxlama zamanı bəzi şəxslərin iş üçün onlara verilmiş icazələrdən sui-istifadə edərək ailəsi ilə birgə istirahətə gəldiyi məlum olub. Bəzilərinin isə qeyri-qanuni yollarla bayramqabağı rayona üz tutduqları müəyyən edilib.

Onlar məsuliyyətdən yaxa qurtarmaq üçün müxtəlif bəhanələr gətirsələr də karantin rejiminin tələbləri onların diqqətinə çatdırılıb və bu tədbirlərin vətəndaşların sağlamlığının qorunması məqsədilə həyata keçirildiyi izah olunub.