Əvvəllər onu “qızıl dən” adlandırırdılar. Zəngin tərkibinə görə beyin inkişafı, saç tökülməsi və dəri üçün olduqca faydalı olan bu bitkidən demək olar ki, Azərbaycan mətbəxində istifadə edilmir. Söhbət darı bitkisindən gedir. Cəlilabadda ilk dəfə olaraq sınaq məqsədilə əkilən 2 hektarlıq darı sahəsinin növbəti ildən genişləndirilməsi nəzərdə tutulub.

Hazırda əksəriyyətimiz darını “quş yemi” kimi tanıyırıq. Ancaq darı dünya xalqları tərəfindən buğda və düyüdən sonra ən çox istifadə olunan qida sayılır. Darı əsasən Şərqi slavyan ölkələrinin milli yeməyi hesab olunur. O, buğda ilə müqayisədə enerji dəyərinə görə aşağı, lakin mineral və vitamin baxımından dəyəri yüksək olan taxıl bitkisidir. Dəninin tərkibində təxminən 11,3 faiz zülal, 81 faiz nişasta, 1,7 faiz şəkər, 3,8 faiz yağ, 1 faiz sellüloz var. Tibdə darı gücü artırmaq, möhkəmləndirici məqsədlə qəbul edilir.

Darı bitkisinin Cəlilabad rayonunda da becərilməsinə maraq yaranıb. Fermer Elşən Əmirov deyir ki, bu bitkini təcrübə məqsədilə əkib: “Biz darını kartofdan sonra əkmişdik. Yəni ikinci əkin kimi. Su problemi olsa da, müəyyən qazanc götürə bildik. İstədiyimizə nail olduq. İstəyirik ki, gələn il sahəni daha da genişləndirək. Gəlirli sahədir”.

Darı çoxillik bitki olmasa da, 3-4 dəfə yaşıl yem kütləsi kimi biçmək də mümkündür. Quru saman küləşinin ətirli qoxusu var və öz yumşaqlığı ilə heyvandarlıqda əvəzolunmazdır.

“Darı bitkisinin küləşini bağlatdırıb, qış boyu heyvanların yemlənməsində istifadə edəcəyəm. Baxmayaraq ki, havalar isti keçir, heyvanlar bunu yaşıl kütlə kimi də indi də çox gözəl yeyirlər. Birinci ildir əkmişik, hektara 200-250 ədəd pres götürəcəyimi düşünürəm”, - deyə Elşən Əmirov bildirib.

Kənd təsərrüfatı məsələləri üzrə ekspert Mirsahib Zəkiyevin sözlərinə görə, bölgədə darıçılıq inkişaf etdirilərsə, düzgün aqrotexniki qulluq sayəsində sahələrin hər hektarından orta hesabla 20-25 sentnerə yaxın məhsul götürülməsi mümkündür. Vegetasiya dövrü 45-50 gün olan darı bitkisi hazırda ölkəmizdə geniş sahələrdə becərilməsə də, əsasən heyvandarlıq və quşçuluq istiqamətində yem istehsalının artırılmasında mühüm rol oynayır.

Azərtac