"Böyük 40 manata, kiçik isə 25 manata satılır"

"Böyük 40 manata, kiçik isə 25 manata satılır"

Astaranın Pensər kəndi qədim tarixə malikdir. Bu kənd tarixi ilə yanaşı, sakinlərinin peşəsi ilə də məşhurlaşıb. Bu peşə isə ağır zəhmət tələb edən təndir düzəldilməsidir. Hətta kənddə qədim tarixə malik “Təndirkəsənlər” məhəlləsi də var. Məhəllə sakinlərinin hamısı eyni peşənin sahibləridir - saxsı materialdan təndir düzəldirlər və gündəlik qazanclarını düzətldikləri təndiri satmaqla əldə edirlər.

Pensər kəndinin ustalarının düzəltdikləri təndirlər digərlərindən fərqlənir. Sarı gil və narın çay qumunun qarışığından hazırlanan bu təndirlər nazik və yüngül olması ilə diqqəti cəlb edir.

Kənddə təndir düzəldən ailələrdən biri də Elşən Hüseynovun ailəsidir. Təndirçinin sözlərinə görə, əvvəllər babası, sonra atası, indi isə özü ailəsi ilə birlikdə təndir hazırlamaqla çörək pulu qazanır: “Azərbaycanda bir dənə təndir məhəlləsi varsa, o da bizim məhəllədədir. Bizim atamız, babamız da bu işlə məşğul olublar. Ona görə əvvəldən də elə bu məhəllədə təndir düzəldənlər məskunlaşıb. Bizim çörəyimiz təndirdən çıxır”.

Təndiri yayda iki günə hazır etmək mümkündür, qışda isə bu iş bir həftəyə başa gəlir. Ölçüləri sifarişçinin istəyindən asılı olaraq dəyişir. Böyük təndir 40 manata, kiçik təndir isə 25 manata satılır. “Müxtəlif növ torpaqlar olur - qara, qumlu... Təndiri isə sarı palçıqdan düzəldirik. O, da əziyyətlə tapılır”, - deyə usta bildirib.

“Təndirkəsənlər” məhəlləsində böyükdən tutmuş kiçiyə kimi hər kəs bu işlə sevə-sevə məşğul olur. Gənc usta sevinir ki, gələcəkdə bu sənətini ailəsində davam etdirən var: “Bir oğlum var. Görürəm ki, onun da bu işə həvəsi var. Bu sənət çox güman ki, itməyəcək, davam edəcək”.

Pensər kəndində 50-dək ailə dolanışığını təndir hazırlayıb satmaqla təmin edir. Çörəyini təndirdən çıxaran bu sənətkarlar ölkənin müxtəlif rayonlarından da sifarişlər alırlar.

Azərtac

26.08.2020 14:33

📲 İndi
Marja.az-ın Telegram kanalına qoşulun və xəbərlər cibinizə gəlsin.

♦️ Ən son və vacib iqtisadi xəbərlər üçün Marja - Biznes və Maliyyə Xəbərləri Portalı
♦️ Ən mühüm xəbərlər üçün Marja.az