21 Sentyabr 2020-ci il tarixindən etibarən beynəlxalq poçt göndərişləri və ya daşıyıcı şirkət vasitəsilə eyni fiziki şəxsin adına hər təqvim ayı ərzində gömrük ərazisinə bir dəfə gətirilən, ümumi gömrük dəyəri 300 ABŞ dollarının ekvivalenti məbləğindən artıq olmayan malların güzəştli və sadələşdirilmiş rəsmiləşdirilməsi aparılacaqdır. Hazırda bu limit 800 dollardır.  

Marja-nın məlumatına görə, Dövlət Gömrük Komitəsinin sədri Səfər Mehdiyev bildirib ki, bir çox işbazlar bu sadələşdirilmiş qaydadan istifadə edərək müxtəlif şəxslərin adına mallar idxal edir və ticarət şəbəkəsinə ötürür. Bu da haqsız rəqabətin yaranmasına səbəb olur:

Poçt göndərişlərinin sadələşdirilmiş qaydada gətirilməsi ilə bağlı ticarət dövriyyəsinə baxdıqda görürük ki, təxminən 70-100 milyon manat civarında vəsait dövlət büdcəsindən yayınmalara səbəb olur.  Fiziki şəxslərin adlarından istifadə edilir, ölü insanların adına telefon, müxtəlif elektron cihazlar və digər əşyalar idxal edirlər. Mallar fiziki şəxslərin adına gətirilərək ticarət şəbəkəsinə verilir. Bu sui-istifadələrin qarşısının alınması üçün limit aşağı salındı.

Sadəcə apardığımız administrativ tədbir nəticəsində telefon aparatlarından 70 milyon manatdan artıq vəsaitin dövlət büdcəsinə köçürülməsi təmin edilmişdir. Bir malın, qərara düzəliş etmədən administrativ qaydada nəzarətə götürərək ticarət şəbəkəsinə sızmasının qarşısını ala bilmişik. Amma biz, bütün mallara rəsmiləşmədən sonra əməliyyat tədbirləri keçirərək nəzrət etməyin deyil, inzibati qaydada tənzimləməyin tərəfdarıyıq. İşbazlar, dırnaqarası iş adamları bu qərardan istifadə etməsinlər. Limitin 800 dollardan 300 dollara salınmasının səbəbi budur. Yəni işbazları dövriyyədən çıxaraq”.

Komitə sədri qeyd edib ki, Qərara düşəliş qüvvəyə mindikdən sonra 70-100 milyon manat civarında vəsaitin dövlət büdcəsinə köçürülməsi təmin ediləcək.