Beynəlxalq maliyyə bazarlarında dolların aparıcı valyutalarına nisbətən qiymətləri Amerikanın fond indeksinin ucuzlaşdığı bir vaxtda bahalaşır. Belə ki, "SP500" indeksi bazar ertəsi tarixi maksimum səviyyəsini yenilədikdən sonra ucuzlaşmağa başlayıb. 3326 dəstək səviyyəsinə yaxın ticarət edilən "SP" indeksi üzrə proqnozlar da günbəgün bədbinləşir. 

"SP" indeksi özündə Amerikanın iqtisadi önəmli şirkətlərinin səhm qiymətlərini əks etdirir. Burada ucuzlaşma alternativ investisiya aləti kimi dollara olan tələb də artır. Dolların aparıcı valyutalara nisbətən orta qiymətini ölçən dollar indeksi isə 1% bahalaşaraq, son üç həftənin maksimum səviyyələrində - 93.91 punktda dalğalanır. Təhlillərə əsasən, dollar 94 punktun üzərində möhkəmlənərsə, 95 və 96.30 punkta kimi də bahalaşa bilər. Dolların ucuzlaşması, EUR/USD və GBP/USD məzənnələrinin də korreksiyasına səbəb olmaqdadır. 

Dünyada Korona böhranı ilə mübarizədə Avropada daha yaxşı vəziyyətdə olmasına və bu səbəbdən də son günlər avroya olan tələbin artmasına baxmayaraq, payız aylarına dair qeyri-müəyyənliyin yenidən artması şəraitində avro ilə müqayisədə güvənli liman maliyyə aləti kimi dollara olan tələb daha yüksəkdir. Breksit ticarət sazişi danışıqları fonunda qeyri-müəyyənliyin artması da funt/dollar məzənnəsində korreksiyanın dərinləşəcəyi proqnozlarını artırır. 

Bununla yanaşı, dollara olan tələb əlvan metallar bazarlarında qızılda müşahidə edilən korreksiya ilə daha da arta bilər. Qızılın bir unsiya üzrə qiyməti 2075$ ilə tarixi rekord maksimum səviyyəsini yenilədikdən sonra korreksiyaya başlayıb. Qiymət 1930$-ın altında qaldıqca, 1856$-ın qırılması ilə 1807 və 1757$-a kimi də ucuzlaşa bilər. 

Bu gün Bakı vaxtı ilə saat 10:00-da İngiltərənin iqtisadi inkişaf, xarici ticarət dövriyyəsi və sənaye dövriyyəsi və saat 16:30-da Amerikanın inflyasiya səviyyəsinə dair dərc ediləcək önəmli göstəricilər də investorlar tərəfindən böyük maraqla gözlənilir. 

Məlumat Azərbaycanın İnvestAZ İnvestisiya şirkətinin analitikləri tərəfindən hazırlanıb.