“Unicapital” İnvestisiya Şirkəti Avropa Yenidənqurma və İnkişaf Bankından “Unibank”ın istiqrazlarını geri alır

Nizamnamə kapitalı 100%-lik “Unibank” KB ASC-yə məxsus olan “Unicapital” İnvestisiya Şirkəti, investorlara dollar valyutasında yeni sərmayə imkanı yaradır.

İnvestisiya Şirkətinin səhmdarı, AZ2011002022 dövlət qeydiyyat nömrəli istiqrazların (“Unibank” KB ASC tərəfindən buraxılıb) “Unicapital” İnvestisiya Şirkəti tərəfindən Avropa Yenidənqurma və İnkişaf Bankından alınması haqda 28 yanvar 2020-ci il tarixində qərar verib. “Unicapital”ın AYİB-dən alacağı 580 ədəd istiqrazın hər birinin nominal dəyəri 10.000 ABŞ dolları məbləğindədir.

“Unicapital” İnvestisiya Şirkətinin səhmdarı bu qərar çərçivəsində 580 ədəd istiqrazın “Unicapital” tərəfindən satışına da razılıq verib.

“Unicapital” İnvestisiya Şirkətinin Müşahidə Şurasının müşaviri Tahir Qəribov bildirib ki, bu sövdələşmə Unibank maliyyə qrupunun Azərbaycan bazarında etibarlı emitentlər tərəfindən investisiya alətlərinin sayını artırmaq istəyi ilə bağlıdır: “Digər tərəfdən son vaxtlar Azərbaycanın kommersiya banklarında dollarda əmanət faizləri, habelə ABŞ dolları ilə olan investisiya alətlərinin məhdudluğu fiziki və hüquqi şəxslərin öz vəsaitlərini bu valyutada effektiv və etibarlı şəkildə yerləşdirmələrini çətinləşdirib. Öz strategiyasına əsasən Unibank, Azərbaycanın qiymətli kağızlar bazarında emitent və investor kimi fəal iştirak etməyi hədəfləyir. Hesab edirik ki, “Unicapital”ın qiymətli kağızlar bazarında fəallığını bir qədər də artırması, bazar iştirakçıları və investorlar üçün yeni imkanlar yaradacaq”.

“Unicapital” İnvestisiya Şirkəti, qiymətli kağızlar bazarında mövqeyini günü-gündən artırmaqdadır. 2007-ci ildən qiymətli kağızlar bazarında böyük təcrübəsi olan və Azərbaycan qiymətli kağızlar bazarında aparılan əməliyyatların həcminə görə ilk sıralarda yer tutan şirkət, yerli və xarici bazarlarda investisiya və qiymətli kağızların buraxılması, habelə törəmə maliyyə alətləri ilə ticarət xidmətləri göstərir.

2019-cu ildən başlayaraq  "Unicapital” İnvestisiya Şirkəti investisiya bazarında strategiyasını dəyişdirib. Əgər 2018-ci ilin sonuna qədər şirkətin məqsədi BFB-də broker əməliyyatları reytinqində ilk yerlərdə olmaq idisə, indi “Unicapital”ın hədəfi korporativ qiymətli kağızlar buraxılış sektorunu inkişaf etdirmək və qiymətli kağızlar vasitəsilə Azərbaycanın qeyri-neft sektorunun maliyyələşdirilməsini genişləndirməkdir.

“Unicapital” İnvestisiya Şirkəti, hüquqi və fiziki şəxsləri də əhatə etməklə böyük müştəri bazasına malikdir. Uğurlu bazar təcrübəsi sayəsində Unicapital istər Azərbaycan bazarına daxil olmaq istəyən xarici investorlar, istərsə də yerli hüquqi və fiziki müştərilər üçün etibarlı tərəfdaşdır.

Qeyd edək ki, 28 dekabr 2017-ci il tarixində Bakı Fond Birjasında (BFB) “Unibank Kommersiya Bankı” ASC-nin  hər birinin nominal dəyəri 10 000 dollar olan 1000 ədəd istiqrazları yerləşdirilmişdir. İstiqrazların tədavül müddəti 6 il  (2190 gün), faiz dərəcəsi 6%, faiz gəlirinin ödəniş müddəti 3 aydan birdir.