““Unimetal” və “Prometal” şirkətlərimiz investisiya təşviqi mexanizmlərindən istifadə edərək son 3 ildə ölkə iqtisadiyyatına 21 milyon manat investisiya yatırıb”.

“Marja”nın məlumatına görə, bunu “Unimetal” MMC-nin direktoru Rüfət Əzizov “Vergi islahatları: birlikdə kölgədən işıqlığa doğru” mövzusunda konfransdakı çıxışı zamanı bildirib.

Metal email şirkətinin rəhbəri bildirib ki, ölkə iqtisadiyyatındakı şəffaflaşma investisiyaların artmasına təkan verir:  

“İlk olaraq şirkətlərin xərcləri, maliyyə hesabatları rəsmiləşir. Bu da şirkətlərin banklardan ucuz və asan kredit cəlb etmələrinə imkan yaradır və investisiyaları artırır.

İqtisadiyyat Nazirliyinin verdiyi İnvestisiya təşviqi sənədinin üstünlükləri də investisiyaları artırır. İnvestisiya təşviqi sənədini almış hüquqi şəxslərin idxal etdikləri  texnikalar, texnoloji avadanlıqlar və qurğular  idxalı gömrük rüsumundan tam azaddır. Həmçinin investisiya təşviqi sənədini almış hüquqi şəxsin əldə etdiyi mənfəətin 50 faizi vergidən azaddır. “Unimetal” və “Prometal” şirkətlərimiz təşviq sənədlərindən istifadə edərək son 3 ildə ölkəyə 21 milyon manat investisiya yatırmışdır”.

Rüfət Əzizov qeyd edib ki, qeyri-leqal bizneslərin rəsmiləşməsi də sərmayə yatırmağı təşviq edir:

“Qeyri-leqal bizneslər qanunsuz elektrik enerjisindən, digər resurslardan, hətta uşaq əməyindən istifadənin, vergidən yayınmanın mənbəyidir. Qeyri-reqal bizneslərin rəsmiləşməsi biz yerli istehsalçıları sevindirir və iqtisadiyyata daha çox sərmayə yatırmağa təşviq edir”.

Rüfət Əzizov gömrük sistemində də ciddi islahatlar aparıldığını, proseslərin şəffaflaşdığını qeyd edib: "Sistem o qədər avtomatlaşıb ki, artıq şirkətimizin öz gömrük işçilərinin olmasına ehtiyacı yoxdur. Ofisdən onlayn bəyannamə yazırıq, mallar buraxılışa verilir, heç gömrüyə getmirik".

“Unimetal” şirkətinin direktoru bildirib ki, sahibkarların aparılan islahatların sürətinə çata bilməmək çətinlikləri mövcuddur:

“Keçid dövrünü yaşayırıq. Dövlətin, Vergilər Nazirliyinin islahat sürətinə, sahibkarların sürəti yetişmir. Sahibkarların yeni qaydalara uyğunlaşması üçün vaxt tələb olunur. Bununda obyektiv səbəbləri var, çünki sahibkarlar təkcə Vergilər Nazirliyi və Gömrük Komitəsi ilə təmasda deyil,  müxtəlif tərəflər var, onların da transformasiya etməsi lazımdır. Hesab edirəm ki, bu keçid dövründə sahibkarlara müəyyən güzəştlər edilməlidir, dostcasına yanaşılmalıdır, gələcək planlar üzrə tələblər qoyulmalıdır”.

İş adamı müəyyən şirkətlərdə əmlak və avadanlıqların tam qeydiyyatda olmaması probleminə də diqqəti çəkib: “Əmalk balansda olmadığından sahibkar onu amortizasiyaya daxil edə bilmir, mənfəəti çoxalır və ödədiyi vergisi artır. Digər tərəfdən sahibkar həmin avadanlıqları banklardan kredit cəlbi zamanı girov kimi istifadə edə bilmir və kreditlərə çıxışı azalır”.

Rüfət Əzizov bildirib ki, Çindən gələn keyfiyyətsiz mallar yerli istehsalçılar üçün müəyyən problemlər yaradır, bu səbəbdən ölkədə standardların tətbiqinə çox ciddi baxılmalıdır: “Biz çox ciddi investisiyalar edirik və bu investisiyaları edərkən bazarda uzunmüddətli qalmağı düşünürük. Bazarda qalmaq üçün də yüksək keyfiyyət olmalıdır. Lakin nə yerli, nə də beynəlxalq standartlara uyğun olmayan, xüsusilə Çindən gələn mallar yerli istehsalçılar üçün müəyyən problemlər yaradır.  “Unimetal” və “Prometal” şirkətlərinin 4 metal emalı müəssisəsi var. Onlar arasında ən innovativi ölkədə ilk polimer örtüklü metal istehsalı zavodudur ki, 1,5 fəaliyyəti dövründə Çindən gələn keyfiyyətsiz malı təqribən 25-30%-ni yerli keyfiyyətli mallar ilə əvəz etmişdir”.