“Bu gün Azərbaycanın ən böyük arıçılıq təsərrüfatı “Qinyət oğulları”na məxsusdur.”

Bunu “Marja”ya açıqlamasında “Qinyət oğulları”nın sahibi Lətif Qiyanətoğlu bildirib.

"Şəkinin Baş Küngüt kəndində fəaliyyət göstərən arıçılıq təsərrüfatımızda 12 min arı ailəsi mövcuddur. Ötən il təsərrüfatda 26 ton bal istehsal edilib. Təsərrüfatımız bu istehsal həcmi ilə Azərbaycanda birincidir", - o deyib.

Lətif Qiyanətoğlu qeyd edib ki, ötən il “Qinyət oğulları”na dövlət tərəfindən arı ailələrinə görə 10 min manata yaxın subsidiya ödənilib.

Təsərrüfatın sahibi əlavə edib ki, ötən il istehsal edilən balın təxminən yarısı daxili bazarda satılıb. Qalan məhsulun satışı, o cümlədən ixrac olunması üçün cəhdlər edilir:

“Yaponlar ilə əlaqələr qurmuşuq. Onlar Azərbaycana səfər etmişdilər. Təəssüf ki, yaponların təklif etdiyi alış qiyməti bizə sərf etmir. Onlar, Yaponiyada balın kiloqramını 8-9 dollardan təhvil verə biləsək ala biləcəklərini söylədilər. Bu qiymət də bizə sərf etmir. Yaponiya bazarında balın satış qiyməti Azərbaycan ilə müqayisədə aşağıdır. Yaponiya bazarına məhsuldarlığın yüksək olduğu ölkələrdən daha aşağı qiymətlərə bal göndərilir”.

Məlumat üçün bildirək ki, "Qinyət oğulları"nın tarixi 1975-ci ilədək uzanır. Həmin il ilk arı pətəkləri alan ailə zamanla pətəklərinin sayını artırıb, həvəskar arçılıqdan peşəkar arıçılığa keçib.1980-cı ildən "Qinyət oğulları" ailəsi köçəri təsərrüfata keçib. Bal yığılması mövsümündə arıları bölgə-bölgə gəzdirərək məhsullarında çeşidlərin sayını artırıblar. Bu gün "Qinyət oğulları" təsərrüfatının arıxanaları Masallı, Lerik, Saatlı,  Yevlax, Ağdaş, Şəki, Oğuz, Zaqatala, Qax və s. rayonlarda yerləşir. İstehsal olunan məhsulların keyfiyyəti, istehsal olunan məhsulların miqdarı, arı pətəklərinin sayı, texnoliji avadanlıqlarına görə "Qinyət oğulları" illərdir Azərbaycanda öz birinciliyini qoruyub saxlayır.