2020-ci ildən respublikamızın ərazisində boyaq bitkilərinin tədarükünə başlanılacaq. Bu proses ölkəmizdə ilk dəfədir ki, həyata keçirildiyindən maarifləndirmə işlərinin aparılmasına ehtiyac var. Ona görə də bu ildən bölgələrdə əhali ilə maarifləndirici görüşlər keçirilir. Növbəti belə tədbir İsmayıllı rayonunun Qalacıq kəndində təşkil olunub.

Qalacıq, Sumağallı və İstisu kəndlərinin sakinlərinin iştirak etdiyi tədbirdə “Azərxalça” Açıq Səhmdar Cəmiyyəti İdarə Heyətinin sədri, professor Vidadi Muradov çıxış edərək son illər xalça fabriklərinin inşası, yun tədarükü, iplik istehsalı istiqamətində görülən işlər barədə danışıb.

Qeyd olunub ki, hazırda "Azərxalça"nın 21 filialı fəaliyyət göstərir. Səhmdar Cəmiyyətin filiallarından 4-ü Şirvan bölgəsində - Kürdəmirdə, Qobustanda, Qəbələdə və İsmayıllıda yaradılıb. Onlardan 2-si İsmayıllı rayonundadır.
Bildirilib ki, “Azərxalça”nın filiallarının və respublikamızda fəaliyyət göstərən özəl xalça istehsalı emalatxanalarının yun ipliklə təmin edilməsi üçün Sumqayıt Kimya Sənaye Parkında Yunəyrici-Boyaq Fabriki tikilib. Bu fabriki xammalla Naxçıvan şəhərində, Bərdə, Qobustan, Şabran və Sabirabad rayonlarında yaradılan regional yun və boyaq bitkilərinin tədarükü məntəqələri təmin edəcək. Həmin məntəqələrdə bu ilin may ayından yun tədarükünə başlanılıb. Gələn ildən isə boyaq bitkiləri tədarük olunacaq. Tədarük olunan yun emaldan keçdikdən sonra ondan iplik hazırlanacaq və həmin iplik toplanan təbii boyaq bitkiləri ilə boyanacaqdır.

Beləliklə, Azərbaycanda ilk dəfə yerli xammal əsasında sənaye üsulu ilə iplik istehsalı və boyama prosesi həyata keçiriləcəkdir.

Vidadi Muradov Şirvan zonasında bitən boyaq bitkiləri haqqında görüş iştirakçılarına ətraflı məlumat verib. Vurğulanıb ki, Azərbaycanda 1500-ə qədər boyaq xüsusiyyətli bitki vardır. Ancaq 84 boyaq bitkisindən xalça iplərinin boyanmasında istifadə olunur.  Bu boyaq bitkilərinin böyük əksəriyyəti İsmayıllı rayonunun ərazisində mövcuddur. Ona görə də tarixən bu ərazidə insanlar xalçaçılıqla məşğul olublar. Tarixən Qalacıq, Sumağallı və İstisu kəndlərində toxunan xalçalar keyfiyyətinə, rəng çalarlarına görə seçilib. Əlbəttə ki, bunun əsas səbəblərindən biri bu ərazidə yetişən boyaq bitkiləridir. Bu kəndlərin sakinləri İsmayıllı şəhərində fəaliyyət göstərən xalça emalatxanalarında çalışır, keyfiyyətli xalçalar toxuyurlar. Əminik ki, onlar boyaq bitkilərinin toplanması işində də  iştirak edəcəklər.

Qeyd olunub ki, bu bölgədən toplanan boyaq bitkiləri “Azərxalça”nın Qobustandakı regional məntəqəsində tədarük olunacaq. İnsanların rahatlığının təmin olunması üçün boyaq bitkilərinin yerlərdə tədarükü həyata keçiriləcəkdir. Yəni kənd sakinləri ərazidəki meşələrdən topladığı boyaq bitkilərini Qobustana getmədən elə öz kəndlərində satacaqlar.

İdarə Heyətinin sədri deyib ki, boyaq bitkilərinin tədarükünə bu işi görəcək adamlar arasında maarifçilik işinin aparılmasından başlamaq lazımdır. Tədarük işi açıq-quru və  günəşli havada həyata keçirilməlidir. Şehli və ya yağışdan islanmış bitkiləri toplamaq olmaz. Çünki bu zaman bitki xammalı düzgün qurumur və öz boyaq xüsusiyyətlərini itirir. Tədarük prosesində boyaq xammalına lazım olmayan kənar bitkilərin və lazım olmayan hissələrin qarışmasına yol verilməməlidir. Bu halda da boyaq xamalının keyfiyyəti aşağı düşür və onun boyama qabiliyyəti azalır.

Rayonun Qalacıq kənd sakini Bəxtiyar Rəhimov çıxış edərək deyib ki, xalçaçılığın inkişafına yönəldilmiş belə tədbirlər əhalinin rifah halının yaxşılaşdırılmasına da böyük təsir göstərir.  O bildirib ki, İsmayıllı rayonunun ərazisi boyaq bitkiləri ilə zəngindir. Bu boyaq bitkilərinin toplanması heç bir xərc tələb etmir. Sadəcə zəhmət çəkmək lazımdır. Boyaq bitkilərinin tədarük olunması rayon sakinləri üçün əlavə qazanc mənbəyidir.
Bəxtiyar Rəhimov onlara göstərilən diqqət və qayğıya görə sakinlər adından ölkə rəhbərinə minnətdarlığını ifadə edib.

Sonra boyaq bitkilərinin təbiətə zərər vurmadan necə toplanması əyani şəkildə tədbir iştirakçılarına izah edilib.