(®) Şokolad uşaqlıqdan bəri əksəriyyətimizin sevdiyi qidadır. Fərqli forma və ölçüdə olmasından asılı olmayaraq şokoladın ağ, qara və südlü çeşidləri vardır. Bir qayda olaraq bu sevimli ləzzət çox tez-tez yeyilir. Bəs şokoladın dad və keyfiyyətini itirməməsi üçün nə etmək lazımdır? "Şokolad elmi"nin incəliklərindən yola çıxaraq, sizi maraqlandıran suallara cavab tapdıq.

Şokolad kakao yağı, kakao tozu, süd və şəkər tozundan istifadə olunaraq hazırlanır. Saxlanılma müddəti  1-2 il arasında dəyişir. Gün işığı, nəm və havaya qarşı həssas olan bu məhsulu keyfiyyətini itirməməsi üçün digər məhsullar kimi düzgün şəkildə saxlamaq lazımdır. Şokolad üçün ideal saxlanılma temperaturu 15-21 dərəcədir. İnsanın əhvalını yüksəldən bu qida qoxuya qarşı həssasdır. Buna görə də onu ədviyyatlardan, ətirlərdən və digər güclü aromatlardan uzaq, sıx qablaşdırmada saxlamaq tövsiyə olunur.

Hava və işıqla təmasda olduqda şokolad oksidləşməyə başlayır. Bu zaman məhsulun tərkibindəki yağın xüsusiyyətləri dəyişir. Beləliklə, şokoladın dadı dəyişərək və xoşagəlməz qoxuya səbəb olur. Şokoladdakı kakao oksidləşmə prosesini ləngidən təbii maddələrə malikdir.

Tünd şokolad digər şokolad növləri ilə müqayisədə ən yüksək kakaonun konsentrasiyasını ehtiva edir. Buna görə oksidləşməyə az meyillidir.

Ağ şokolad kakao tozu istifadə edilmədən hazırlanır. Buna görə də müdafiə təbəqəsi yoxdur və kənar təsirlərə qarşı həssasdır. Oksidləşmənin qarşısını almaq üçün ağ şokoladı hava keçirməyən və qeyri-şəffaf paketdə saxlamaq tövsiyə olunur.

Məhsulun keyfiyyətli olması onun hazırlanmasından asılıdır. Bəs çox sevdiyiniz bu dadın necə hazırlandığı sizi heç maraqlandırmır? Proseslə tanış olmaq üçün yerli brendimiz olan "Ulduz" şokolad fabrikinə yollandıq.

İlk olaraq qeyd etməliyəm ki, burada bizimlə yanaşı, ekskursiyaya gələn başqa qonaqlar da vardı. Gigiyena qaydalarına riayət etməklə böyükdən kiçiyə hər kəs istehsalat prosesini izlədi.

Biz "Sweet" şokolad konfetinin hazırlanması ilə tanış olduq. Konteynerlərdə bol südlü karamel yer fındığı ilə qarışdırılaraq içlik halına gətirildi. Daha sonra hazırlanmış içlik kəsimə göndərildi.

Standart ölçülərdə kəsilən içlik Belçikanın məşhur Barry Callebaut şirkətindən gətirilən xalis şokoladla örtüldü.

"Sweet" şokolad konfetləri soyutma mərhələsini keçdikdən sonra, metal detektordan keçirildi. Ulduz şokolad fabrikinin Keyfiyyətə nəzarət departamentinin rəhbəri Lalə Qasımova qeyd etdi ki, bu mərhələ məhsulun tərkibində yad cisimlərin olmadığını sübut etmək üçündür. Sonda şokoladlar paketlənmə mərhələsinə keçdi. Hazırlanma prosesində xüsusilə diqqətimizi çəkən məqam, şokoladların əl dəymədən, müasir standartlara cavab verən, təmiz və təhlükəsiz şəraitdə hazırlanması oldu.

Məhsul qablaşdırılarkən istehsal tarixi qeyd olunaraq, daşınma mərhələsinə göndərildi. Üzərində qeyd olunan son istifadə tarixi göstərilən müddətdə məhsulun keyfiyyətinə zəmanət verməsi deməkdir. Buna görə də şokolad alarkən qablaşdırmaya diqqət etməklə yanaşı, son istifadə tarixinə baxılmalıdır. Qablaşdırması korlanmış, günəş şüası altında saxlanılan məhsuldan uzaq olmağınız tövsiyə olunur.

Hazırlanan məhsulu yerindəcə dadaraq belə qərara gəldik ki, bu ləziz dadı saxlamaq deyil, aldıqdan dərhal sonra yemək lazımdır. Yəqin ki, bir çox şokolad sevərlər İrlandiyalı yazıçı Oskar Uayldın bu sözləri ilə razılaşacaq: "Cazibədən başqa hər şeyə qarşı çıxa bilərəm".