“Ərzaq məhsullarının tədarükü və təchizatı” ASC Ağcabədi, Ağdam, Bərdə, Beyləqan və Füzuli rayonı fermerlərinə müraciət edib.

ASC adı çəkilən rayonlardan istənilən kənd təsərrüfatı məhsullarını tədarük etməyə hazırdır.

Bu məhsullar sırasına mal əti, kərə yağı, pendir, duzlu və duzsuz şor, kələm, yerkökü, çuğundur, noxud, qarabaşaq, yarma, darı, lobya,turşular və s. məhsullar daxildir.

Bu fikirləri Cəmiyyətin İdarə Heyətinin sədr müavini Xalıq Məmmədov Ağcabədi şəhərində keçirilmiş regional müşavirədə bildirib.

Müşavirədə Cəmiyyətin Yuxarı Qarabağ Regional Bölməsinə daxil olan rayonlarda fəaliyyət göstərən 278 satınalan təşkilat ( uşaq bağçaları, xəstəxanalar, icra nümayəndələri və digər müəssisələr) nümayəndələri, istehsalçılar, torpaq mülkiyyətçiləri iştirak ediblər.

X.Məmmədov bildirib ki, ölkə prezidenti Cəmiyyət qarşısında qapalı müəssisələri keyfiyyətli ərzaq məhsulları ilə təmin etmək, yerli istehsalçıları stimullaşdırmaq məqsədini qoyub. Ona görə Cəmiyyət qərara gəlib ki, hər bir rayondakı satınalan təşkilatı elə həmin rayonda istehsal edilən məhsullarla təmin etsin.

“ Bu sistemi qurmaq hər bir rayonda istehsal edilən məhsulların elə həmin rayonda realizə olunmasına, ucqar dağ kəndlərində yaşayan istehsalçılara əlçatan bazarların müəyyən olunması, kiçik və orta təsərrüfatların dövriyyə vəsaitlərinin artmasına səbəb olacaq”.

“ Ağcabədi, Ağdam, Bərdə, Beyləqan və Füzuli rayonlarından olan fermerlərə xüsusi müraciət ona görə edirik ki, bu rayonlarımız zəngin təsərrüfat ənənələrinə malik olmaqla ölkə əhalisinin heyvandarlıq və bitkiçilik məhsulları ilə təmin olunmasında xüsusi rol oynayır. Bu rayonlarda geniş dəmyə və suvarılan torpaqlar mövcuddur, əgər bu torpaqları əkmirlərsə onları Cəmiyyətlə əməkdaşlığa dəvət edirəm. Cəmiyyət potensial istehsalçılara avans sistemi vasitəsi ilə maliyyə dəstəyi verə bilər, buna ehtiyacı olmayanların isə bütün növ məhsullarını tədarük edə bilər. Tədarük zamanı fermerlərin məhsullarını tarlabaşında, heç yerə getmədən orta bazar qiymətlərinə alınacaq”-deyə Cəmiyyət rəsmisi bildirib.

Xatırladaq ki, “ Ərzaq məhsullarının tədarükü və təchizatı” ASC bölgələrdə yerli məhsulların tədarük potensialını yaratmaq məqsədi ilə regionlarda satınalan təşkilatlarla maarifləndirici görüşlər keçirir.Növbəti görüş Cəmiyyətin Yuxarı Qarabağ Regional Bölməsi üzrə (Ağcabədi, Ağdam, Bərdə, Beyləqan, Füzuli rayonları) Ağcabədi şəhərində baş tutub. Görüşdə üz yüz nəfərə qədər dövlət satınalan təşkilat və icra nümayəndələri, bölgə istehsalçıları iştirak ediblər.

Regional müşavirədə tədarük-təchizat səviyyəsinin yüksəldilməsi, yerli məhsulların tədarük imkanları haqqında təkliflər irəli sürülüb, bəzi fermerlərlə məhsullarının satın alınması haqqında razılıq əldə edilib.