4 dekabr 2018-ci il tarixində Bakı Fond Birjasının (BFB) təşəbbüsü ilə Azərbaycan Respublikasının Ailə, Qadın və Uşaq Problemləri üzrə Dövlət Komitəsinin, YARAT Müasir İncəsənət Məkanının, Azərbaycan Dövlət Mədəniyyət və İncəsənət Universitetinin, Respublika İncəsənət Gimnaziyasının və “İnvest-Az” İnvestisiya şirkətinin dəstəyi ilə “Müasir Azərbaycan“ mövzusunda rəsm sərgisi keçirilmiş və bu çərçivədə qaliblərin mükafatlandırma mərasimi baş tutmuşdur.

BFB-nin sosial məsuliyyətlilik layihəsi çərçivəsində keçirilən sərginin məqsədi istedadlı gənclərin və yeniyetmələrin aşkarlanması, eləcədə xüsusi qayğıya ehtiyacı olan uşaqların cəmiyyətə inteqrasiyasından ibarətdir.

Müsabiqəyə daxil olan rəsm əsərləri peşəkar rəssamlar və sənətşünaslar tərəfindən qiymətləndirilmişdir. Ümumilikdə müsabiqədə Bakı şəhəri daxil olmaqla 11 rayondan istedadlı yeniyetmə və gənc rəssamlar iştirak etmiş və 150-ya yaxın əsər təqdim olunmuşdur. Münsiflər heyəti tərəfindən müəyyən edilmiş qaliblərə pul mükafatı və həvəsləndirici hədiyyələr təqdim olunmuşdur.

Tədbirdə çıxış edən Bakı Fond Birjasının İdarə Heyətinin Sədri Vüqar Namazov artıq üçüncü ildir davam edən layihənin uğurlarından danışaraq, istedadlı gənclərin  aşkar edilməsi, cəmiyyətə inteqrasiyası istiqamətindən keçirilən tədbirin vacibliyini qeyd edib. V.Namazov ölkənin müxtəlif şəhər və rayonlarını təmsil edən yeniyetmə və gənclərin “Müasir Azərbaycan“ mövzusunda yaratdıqları  rəsm əsərlərin fərqli bir forma və cəlbedici olmasının sevindirici hal olduğunu bildirərək iştirakçılara uğurlar arzu edib.

Ailə, Qadın və Uşaq Problemləri üzrə Dövlət Komitəsinin sədr müavini Aynur Sofiyeva çıxış edərək, dövlət tərəfindən gənclərin hərtərəfli inkişafına dəstək göstərildiyini və bu kimi tədbirlərin təşkil edilməsinin dövlətimizin gənclər siyasətinə vacib töhfəsi olduğunu bildirdi. A.Sofiyeva bu ilin sentyabr ayında start verilən layihədə xüsusi qayğıya ehtiyacı olan uşaqların əsərlərinin də yer almasının çox təqdirəlayiq hal olduğunu tədbir iştirakçılarının diqqətinə çatdırıb.

Tədbirin davamında çıxış edən İnvestaz investisiya şirkətinin rəhbəri Elşən Quliyev müsabiqə iştirakçıların gələcəkdə uğurlar arzu edərək onlara daima dəstək göstərməkdən məmnun olduğunu bildirib. Müsabiqəyə təqdim edilmiş rəsm əsərlərinin maraqla qarşıladığını və gənclər arasında  vətənpərvərlik hissələrinin aşılanmasında əhəmiyyətli olduğunu qeyd edib.

“YARAT” Müasir İncəsənət Məkanının Bədii direktoru Suad Qarayeva Maleki öz çıxışında sərgiyə təqdim olun əsərlərin gənclərin inkişafında əhəmiyyətli rolundan danışıb. Suad xanım gənclərin kreativ düşüncələrinin önəmli olduğunu vurğulayaraq, YARAT təşkilatının təşkil etdiyi fərqli layihələrdə onların iştirak edib, daha da aktiv olmağa dəvət edib.

Münsiflər heyəti adından danışan xalq rəssamı Arif Əziz təqdim edilən əsərlərdə işləmə texnikası, müəlliflərin düşüncələri və qoyulan mövzuya uyğunluğu istiqamətində aparılan işlər barədə məlumat verib. A. Əziz mövzunun aktuallığı və müsabiqədə iştirakçı sayının çox olması səbəbindən münsiflər heyəti tərəfindən seçim turunun iki mərhələli keçirilməsi zəruriyyəti yaratdığını nəzərə çatdırıb. 

Qaliblər mükafatlandırıldıqdan sonra tədbir Azərbaycan Dövlət Mədəniyyət və İncəsənət Universitetinin tələbələrindən ibarət konsert proqramı ilə davam etdirilib.