Neft İxrac Edən Ölkələr Təşkilatı (OPEC) xam neftin qiymətinin sabitliyini təmin etməlidir.

Bu sözləri İraqın neft naziri Thamer Ghadhban deyib.

O bildirib ki, OPEC neftin qiymətinin sabitliyini təmin etməli və geosiyasi proseslərin neft bazarına verdiyi zərərin minimuma endirmək üçün orta və uzunmüddətli strategiya hazırlamalıdır: “İraq bu həftə OPEC-in yığıncağında bazarın sabitləşməsi və qiyməti dəstəkləmək üçün yardımçı olacaq. Neftin qiymətinin aşağı düşməsinə mane olmağın tək yolu istehsalı azaltmaq deyil. Toplantıda qəbul ediləcək hər bir qərar OPEC-ə üzv və qeyri-OPEC ölkələrinin maraqlarına uyğun olmalıdır”.

Qeyd edək ki, İraq Səudiyyə Ərəbistanından sonra OPEC-in ikinci böyük neft istehsalçısıdır.

Dekabrın 6-da Vyanada OPEC Nazirlər Şurasının 175-ci iclası keçiriləcək. Toplantıda OPEC üzrə hasilatın azaldılması ilə bağlı qərar qəbul olunması gözlənilir. İclasda, həmçinin iyunun 22-də keçirilən OPEC Nazirlər Şurasının 174-cü iclasından ötən dövr ərzində neft bazarında baş verən proseslər nəzərdən keçiriləcək. Bundan başqa, ABŞ-ın İrana qarşı sanksiyaları fonunda neft bazarında tələb və təklifin vəziyyəti, cari ilin sonunda başa çatacaq Vyana razılaşmasından sonra da OPEC və qeyri-OPEC ölkələri arasında əməkdaşlığın davam etdirilməsi, Rusiyanın müşahidəçi ölkə kimi OPEC-ə qoşulması məsələləri müzakirə olunacaq. İclas çərçivəsində Rusiya ilə OPEC-in əməkdaşlıq müqaviləsi imzalaması da planlaşdırılır.

Xatırladaq ki, 2016-cı il noyabrın 30-da OPEC üzrə gündəlik neft hasilatının 1,2 milyon barrel azaldılaraq 32,5 milyon barrelə endirilməsi barədə razılıq əldə olunub. Həmin il dekabrın 10-da Vyanada OPEC üzvləri ilə təşkilata daxil olmayan 11 ölkə, o cümlədən Azərbaycan ümumi hasilatın sutkada 558 min barrel azaldılması barədə sazişə imza atıb. Ötən il noyabrın 30-da isə OPEC Nazirlər Şurasının 173-cü iclası çərçivəsində təşkilata üzv və kartelə daxil olmayan dövlətlərin nazirlərinin üçüncü görüşündə neft hasilatının azaldılmasına dair sazişin müddətinin 2018-ci ilin sonuna kimi uzadılması ilə bağlı qərar qəbul olunub. Cari il iyunun 23-də isə OPEC və qeyri-OPEC ölkələri nazirlərinin IV iclasında hasilat kvotasının 100 faizlik icrası, yəni neft hasilatının sutkada 1 milyon barrel artırılması ilə bağlı razılıq əldə olunub. Azərbaycanın da dəstəklədiyi bu qərar iyulun 1-dən qüvvədədir.