Azərbaycan Milli Elmlər Akademiyası (AMEA) İqtisadiyyat İnstitutunun "NBC Bank" ASC-nin baş sponsoruğu ilə gənc iqtisadçı tədqiqatçılar arasında keçirdiyi elmi məqalə müsabiqəsi başa çatıb.

“Marja” xəbər verir ki, 18 Oktyabr 2018-ci il tarixində Azərbaycan Milli Elmlər Akademiyasında təşkil edilmiş tədbirdə qaliblərin adları açıqlanıb.

Tədbirdə Azərbaycan Respublikası Milli Məclisinin deputatı, AMEA-nın həqiqi üzvü Ziyad Səmədzadə, Azərbaycan Milli Elmlər Akademiyasının prezidenti  Akif Əlizadə, İqtisadiyyat İnstitutunun direktoru Nazim Müzəffərli, Çin Xalq Respublikasının və Gürcüstan Respublikasının Milli Elmlər Akademiyaların üzvləri, “NBC Bank”ın Müşahidə Şurasının sədri Fuad Qənbərov, “NBC Bank”ın Baş direktoru Qasım Əliyev iştirak ediblər.  

Münsiflər heyətinin qərarına görə, 1-ci yerə AMEA İqisadiyyat İnstitutunun şöbə müdiri Leyli Allahverdiyeva “Dövlətin iqtisadiyyata modelyaradıcı müdaxiləsi və turizmin inkişafı” adlı məqaləsinə görə layiq görülüb.

2-ci yerə “Xəzər” Universiteti, Azərbaycan Dövlət İqtisad Universitetinin müəllimi Şəhriyar Muxtarov və Azərbaycan Dövlət İqtisad Universitetinin müəllimi Şahin Əkbərov layiq görülüblər.

3-cü yer üzrə isə AMEA İqtisadiyyat İnstitutunun elmi işci Ceyhun Hüseynov və Azərbaycan Dövlət  Neft və Sənaye Universitetindən Şəhzadə Mədətova qaliblər elan ediliblər.

Müsabiqənin qaliblərinə fəxri diplomlar və pul mükafatları təqdim olunub. “NBC Bank” tərəfindən birinci yerin qalibinə 1500 manat, ikinci yerin qaliblərinin hər birinə 1000 manat, 3-cü yerin qaliblərinin hər birinə isə 500 manat mükafat təqdim olunub.

Qeyd edək ki, müsabiqə AMEA İqtisadiyyat İnstitutunun 60 illik yubiley tədbirləri çərçivəsində, ölkənin müxtəlif elmi-tədqiqat müəssisələrində və ali məktəblərində çalışan gənc iqtisadçı tədqiqatçıların elmi fəaliyyətlərini stimullaşdırmaq məqsədilə keçirilib.