Türkiyədə məhkəmə amerikalı keşiş Endryu Branson barədə qərarını açıqladı.

"Marja" xəbər verir ki, qərara görə, Bransona 3 il 1 ay 15 gün həbs cəzası verilib. Onun 2016-cı ildən həbs edilməsi nəzərə alınsa, Bransonun azadlığa buraxılacağı bildirilir. 

Bransonun ev həbsi və xaricə çıxışı qadağası da ləğv edilib. 

Bakı vaxtı ilə saat 17:29-da Dollar/TL məzənnəsi 5.8612 səviyyəsindək düşümüşdü. Bakı vaxtı ilə saat 17:48-ə olan məlumata görə, məzənnə yenidən bir qədər yüksələrək 5.9723 səviyyəsinə qalxıb.

Türkiyə mətbuatı keşişin sərbəst buraxıldığını bildirir. Bransona verilən 3 il 1 ay 15 günlük cəza, Bransonın həbsxanada qaldığı müddətə sayılıb və ABŞ-lı keşiş bir daha həbsxanaya girməyəcək. Artıq Branson məhkəmə zalından evinə gedib. Onun Amerikaya yollanacağı gözlənilir.

İlk öncə prokuror Bransona 35 il cəza verilməsini istəyirdi. Bu gün məhkəmədə isə prokuror Bransona 5-10 il cəza verilməsini istədi. Hakimlər isə Bransona 3 il 1 ay 15 gün həbs cəzası verdi.

Saat  16:35

Türkiyədə teror təşkilatları adına cinayət törətməkdə və cəsusluqda ittiham olunan ABŞ-lı keşiş Endryu Bransonun məhkəməsi davam edir.

 
"Marja" xəbər verir ki, prokuror Bransonun ev həbsi qərarının ləğv edilməsini və "teror təşkilata üzv olduğuna görə" 5-10 il azadlıqdan məhkum edilməsini istəyib.

İndi hakimin qərarı gözlənilir. Bransonın yatdığı müddət də nəzərə alınaraq azad ediləcəyi gözlənilir

"Prokuror mütaliəsində Branson haqqında nəzarət qərarının götürülməsini və 5-10 il həbs cəzası verilməsini istəyib. Nəzarətin götürülməsi Bransonun ev həbsinin sona çatması anlamına da gəlir",- Türkiyə mətbuatı yazır.

Bakı vaxtı ilə saat 16:58-də Dollar/TL məzənnəsi 5.8442 səviyyəsində olub. Bu gün Lirə 1,4% bahalaşıb. 

Qeyd edək ki, bu gün keçirilən məhkəmə iclasında iddianamədə yer alan şahidlər dinlənilib. Şahidlərdən üçü Branson əleyhinə verdiyi ifadələri dəyişib.

Məhkəmənin kilid isimlərindən olan Levent Kalkan daha öncə 15 İyul dövlət çevrilişi cəhdi zamanı bəzi əsgərlərin Bransonun evində qaldığını söyləmiş və bu məlumatı Yılmaz Demircandan eşitdiyini bildirmişdi.
 

İclasda Kalkan və Demircan üzləşib. Demircan, "Bu evdə mən, sadəcə, koreyalıları gördüm" deyəndə, məhkəmə sədrinin "Bəs FETÖ-çülər qalmışdı bu evdə?" şəklindəki sualına Levent Kalkan, "Mən belə bir şey deməmişəm" deyərək cavab verib.
 

Levent Kalkan ifadəsinin yanlış anlaşıldığını bildirib.

Branson da iddiaları rədd edib, FETÖ-çuları tanımadığını bildirib.

ABŞ-lı keşiş Branson 2016-cı ilin Dekabr ayında terror təşkilatı adına cinayət törətmək və casusluq ittihamları ilə həbs olunmuş və 25 İyulda həbsi ev həbsinə çevrilmişdi.

Bransonın 25 İyuldakı iclasda sərbəst buraxılmaması Türkiyə ilə ABŞ arasında böhrana səbəb olmuş və Ağ Ev rəhbərliyi daxili işlər naziri Süleyman Soylu və ədliyyə naziri Əbdülhəmid Gül haqqında sanksiya tətbiq etmək qərarı vermişdi. Qərardan sonra Türk Lirəsi kəskin ucuzlaşmışdı.
 

Daha sonra ABŞ Prezidenti Donald Tramp, Türkiyədən polad və alüminium idxalına tətbiq olunan gömrük tariflərinin iki dəfə artırıldığını açıqlamışdı.