InvestAZ İnvestisiya şirkətinin analitikləri bu həftə üzrə dünya maliyyə bazarlarında son vəziyyət və qısa müddət ərzində gözlənilənlərlə bağlı məlumat verib.

EUR

Beynəlxalq valyuta birjalarında EUR/USD məzənnəsi 1.15$-a kimi ucuzlaşıb və 1.16$-ın altında qaldıqca, 1.14$-a kimi də ucuzlaşa biləcəyi proqnozlaşdırılır.

Avropada İtaliya və İngiltərə ilə siyasi mövzular ətrafında müzakirələr fonunda risklərin mövcudluğu, iqtisadiyyata mənfi təsir etməklə, avronun qiymətinə də mənfi təsir edir.

Bununla yanaşı, cümə axşamı Bakı vaxtı ilə saat 15:30 və 16:30-da müvafiq olaraq açıqlanacaq Avropa Mərkəzi Bankının pul siyasəti ilə bağlı toplantı protokolu və ABŞ-ın inflyasiya ilə bağlı önəmli fundamental göstəriciləri də investorların diqqət mərkəzindədir.

GBP

GBP/USD məzənnəsi 1.31$-a ticarət edilməkdədir və ümumilikdə qiymət 1.32$-ın altında qaldıqca, eniş dalğasınin 1.29$-a kimi də davam edə biləcəyi proqnozlaşdırılır.

İngiltərənin Avropa Birliyindən ayrılması planının cəmiyyətdə yaratdığı fikir ayrılığı funta olan təzyiqlərin artmasına təsir edir. Bununla bağlı xəbərlər diqqət mərkəzində saxlanılmalıdır.

Çərşənbə günü saat 12:30-da dərc ediləcək İngiltərənin iqtisadi inkişaf göstəricisi ilə bağlı statistik göstəricilərin də məzənnəyə güclü təsiri olacaqdır.

TRY

Türkiyə maliyyə bazarlarında da lirənin qiyməti keçən həftə ərzində 6% ucuzlaşıb və keçən həftənin minimum səviyyəsini yenidən qırarsa, 6.29TL-yə kimi də ucuzlaşa bilər.

OIL

Avropanın Brent markalı neftinin bir barel qiyməti “OPEC+” ölkələrinin bəyanatının təsiri fonunda 87$-a kimi 11% bahalaşdıqdan sonra 83$-a kimi korreksiya edib. Təhlillərə əsasən, ucuzlaşma 81$-a kimi də davam edə bilər.

Bu həftənin cümə axşamı saat 18:30-da yayımlanacaq ABŞ-ın neft ehtiyatları ilə bağlı statistik məlumatların da qiymətə güclü təsir edəcəyi gözlənilir.

GOLD

Əlvan metallar bazarlarında isə qızılın qiyməti 1200$-ın (38.6 $/qram) altında təklif edilməkdədir və sözügedən səviyyənin altında qaldıqca, 1190$-a (38.3 $/qram) kimi də dəyər itirə bilər.

FED-in faiz artımından sonra dollara olan tələbin artması, “güvənli liman” maliyyə aləti kimi qızıla olan marağın daha da azalmasına səbəb olur.

İnvestisiya ilə bağlı suallarınızı *1234 telefon nömrəsi və www.investaz.az veb saytı vasitəsilə bizə ünvanlaya bilərsiniz.

“İnvest-AZ İnvestisiya Şirkəti” QSC-nin Analitika Departamenti

“İnvest-AZ İnvestisiya Şirkəti” Qapalı Səhmdar Cəmiyyətinin fəaliyyəti Azərbaycan Respublikası Maliyyə Bazarlarına Nəzarət Palatası tərəfindən tənzimlənir. Şirkət, 09.01.2016-cı il tarixli 087986 saylı lisenziyası əsasında broker, anderraytinq (diler), marja ticarəti (forex), fərdi investorların portfelinin idarə edilməsi, market meykerlik və sair investisiya xidmətləri üzrə fəaliyyət göstərməkdədir.

Risk bildirişi.

Yuxarıda göstərilən məlumatlar tamamilə tövsiyə xarakterlidir. Bu fəaliyyət üzrə həyata keçirilən əməliyyatlar yüksək risk qrupuna daxildir və “İnvest-AZ İnvestisiya Şirkəti” QSC yuxarıda göstərilən məlumatlar əsas götürülməklə, həyata keçirilən investisiya əməliyyatları üzrə heç bir öhdəlik daşımır.