Çindən idxal olunan keyfiyyətcə aşağı və ucuz məhsullar Azərbaycanda ilk polimer örtüklü dəmir rulon istehsalçısı olan “Prometal” şirkəti üçün çətinliklər yaradır.

Şirkətdən "Marja"ya bildirilib ki, Çindən idxal olunan keyfiyyətcə aşağı və ucuz polimer örtüklü rulonlar yerli şirkətin maksimal yüklənməsini təmin etməyə imkan vermir: "Bir çox ölkələrdən (Türkiyə, Rusiya, Özbəkistan, Belorusiya, Kazaxstan, Ukrayna və s.) fərqli olaraq Azərbaycanda Çindən idxal olunan polimer örtüklü dəmir rulonlara heç bir antidempinq vergi rüsumu tətbiq olunmur. Bu da, "Prometal" şirkəti üçün müəyyən çətinliklər yaradır". 

Bununla yanaşı boya və kimyəvi maddələr ölkəyə gətirilərkən “Prometal” şirkəti 15% rüsum ödəməli olur. Arzu olunan güzəştlər planı hazırlanaraq İqtisadiyyat Nazirliyinə təqdim olunmuşdur. Bu güzəştlər olarsa, “Prometal” şirkəti maya dəyərini bir qədər də azaldacaq və yerli bazara münasib qiymətli, keyfiyyətli məhsullar təklif edə bilər. Əlavə olaraq, şirkətin ixracetmə qabilliyyəti yüksələcək və yaxın gələcəkdə Qazaxıstan və Gürcüstan kimi ölkələrin bazarlarına daxil olacaq.

Öncə xəbər verildiyi kimi, “Prometal” şirkəti Bakıda polimer örtüklü qalvanizli dəmirin istehsalına başlamışdır. “Prometal” şirkəti İqtisadiyyat Nazirliyindən verilən “investisiyaların təşviq sənədi”-dən yararlanaraq, tikinti dövründə avadanlıqların idxalı zamanı mühüm güzəştlər əldə etmişdir. Zavod  Avstraliya şirkəti ‘’Bronx International”ın qurğuları ilə təchiz olunub, hansı ki, ildə 50 min ton istehsal həcminə malikdir. Buraxılan çeşid 0.18-0.8mm qalınlıqlı polimer örtüklü rulonlardır. Qeyd edək ki, dam örtükləri, sendviç panellər, polad tavanlar, məişət texnikası və fasad materialları hazırlanan zaman polimer örtüklü dəmir rulonlar xammal kimi istifadə olunur. Bu günə qədər örtüklərdən parlaq poliester, matt poliester və məxməri poliester istehsalı da uğurlu şəkildə həyata keçirilmişdir. 

İDXALI QİSMƏN YERLİ İSTEHSAL İLƏ ƏVƏZ EDİB

Metal biznesi üzrə dünyaca məşhur ‘’Metal Expert’’ xəbər portalının verdiyi məlumata görə, Azərbaycanda ilk polimer örtüklü dəmir rulon istehsalçısı olan “Prometal” şirkəti avqust ayında 1700 ton polimer örtüklü dəmir rulon istehsal edərək, ölkəyə idxal olunan eyni adlı malı qismən yerli istehsal ilə əvəz etmişdir.

Avqust ayında istehsal edilən polimer örtüklü dəmir rulonların göstəricisi iyul ayına nisbətən 30% daha çox olmuşdur.

“Prometal” şirkəti aprel ayında yaranmasına baxmayaraq, məhsul istehsalını 2 dəfə artırmışdır və milli brend kimi öz yüksək keyfiyyəti ilə alıcıların güvənin qazana bilmişdir.