Onlayn video platforması Youtube-un arxasındakı Google, reklamdan ildə təxminən 100 milyard dollar qazanır. Çəkib yüklədiyi videosu on min dəfələrlə izlənsə belə, videonu yükləyənlər sadəcə bir neçə dollar qazana bilirlər.

Dünyanın ən böyük onlayn video platforması Youtube-ın ABŞ-dakı ofisinə təşkil etdiyi silahlı hücumda intihar edən azərbaycanlı Nasim Aghdam, Google-ın onlayn reklam "piroqundan" pay almağa çalışan "Youtuberlərin" qarşı-qarşıya qaldığı qaranlıq bir üzü nümayiş etdirdi. 

"Marja" xəbər verir ki, dünya miqyasında 1 milyarddan artıq istifadəçisi olan Youtube, Google-ın 2017-də 110 milyard dolları aşan gəlirlərində də əhəmiyyətli bir paya malikdir.

Google-ın bu onlayn video izləmə platforması yalnız reklam verənlərin deyil, bu platformaya video yükləyən məzmun istehsalçılarının da əhəmiyyətli bir gəlir qapısıdır. 

İş hər nə qədər "Pişik videosu çək, Youtube-a yüklə və pul qazan" kimi sadə şəkildə dəyərləndirilsə də, əslində bu platforma vasitəsilə mütəmadi gəlir əldə etmək üçün Google və Youtube-un tez-tez dəyişən axtarış nəticələri və təklif olunan videoları necə göstərdiyini müəyyən edən alqoritmlərini təhlil etmək lazımdır.

100 min dəfə izlənən bir videonun, bu videonu yükləyənə qazandıracağı məbləğ 100-dən çox meyara görə dəyişir. Üstəlik, Youtube üzərindən əldə ediləcək gəlir, kanalın yerləşdiyi ölkə və dilə görə də dəyişir. Məsələn, 1000 dəfə göstərməyə görə gəlir, ABŞ-da orta hesabla 5-6 dollara çatarkən, aparılan təhlillərə əsasən inkişaf etməkdə olan ölkələrdə isə bu məbləğ təxminən 1 dollar təşkil edir. Vəziyyət belə olunca da çox "Youtuber" də məyus olur.

Bu dramın ən son nümunəsi olan Nasim Aghdam da internet saytında Youtube-ın gəlir paylama siyasətlərini, "300 min dəfə göstərmənin gəliri 0.10 dollar?" sözləri ilə tənqid etmişdi.

Youtube-un baş qərargahına hücum təşkil edən Nasim Aghdam, "kanalındakı videoların filtirlənməsinə" görə gəlirinin və populyarlığının azaldığını bildirmişdir. O videolarında buna görə Youtube-ı günahlandırıb.

Aghdamın veb saytında yer alan videolarında, Youtube istifadəçilərinin reklam gəlirlərindən bəhrələnməsini təmin edən sistemi 20 Fevralda dəyişdirməsi və mindən az davamçısı olan kanallardan reklam ödəmələrini dayandırması tənqid edilir.