Trampın həmləsi "qara qu" təsiri yarada bilər

ABŞ-ın maliyyə məsləhətləri şirkəti "Raymond James"in mütəxəssislərindən Jeff Saut, ABŞ Prezidenti Donald Trampın açıqladığı yeni vergi qərarının ciddi bir ticarət müharibəsinə çevrilə biləcəyini və bunun bazarlarda "qara qu" təsiri yaradacağını deyib.

Bir çox ölkə ABŞ-ın dəmir və alüminium idxalına tətbiq edəcəyi vergilərə sərt reaksiya göstərib. ABŞ Prezidenti Trampın, Avropa ölkələrinin cavab tədbirləri görməsi vəziyyətində Avropa istehsalı olan avtomobillərə vergi tətbiq edəcəyini söyləməsi ticarət müharibəsi narahatlıqlarını daha da artırıb.

Trampın əlavə gömrük vergisi açıqlamasından sonra “Dow Jones” səhmləri həftə ərzində 3 faiz, S&P 500 indeksi isə 2 faiz düşmüşdü.

"Marja" xəbər verir ki, CNBC-yə danışan Jeff Saut, ABŞ-ın yeni vergilərinin bazarlara mənfi təsir göstərməsini gözlədiyini bildirərək, bir neçə həftə ərzində baş verəcək proseslərin təqib edilməsi lazım olduğunu deyib. Ehtimal olunan bir ticarət müharibəsinin bazarlarda "sancılı" bir prosesi başlada biləcəyini qeyd edən Saut, vəziyyət aydınlaşana qədər investorların təmkinli davranaraq "gözlə gör" siyasəti aparmalarını tövsiyyə edib.

Saut, "Həqiqi mənada bir ticarət müharibəsi başlayarsa, nə olacaqdır bilmirəm. Qarşı tərəflərdən cavab tədbirləri həmləsi gələ bilər, bunu bir neçə həftə ərzində görəcəyik. Bu prosesdə qarışıqlıq keçənə qədər gözləmək ən doğrusudur" deyib.

Saut, proseslərin "buğa" bazarından çıxmağa səbəb olacağını isə gözləmədiyini bildirərək, "Bu qarışıqlığın qısamüddətli olduğunu, uzun perspektivdə bir satınalma imkanı yaradacağını düşünürəm" deyə danışıb.

“QARA QU” TƏSİRİ NƏDİR?

On altıncı əsrə qədər ingilis dilində "mövcud olmayan" mənasında işlədilən "qara qu" ifadəsi, bütün qular ağ məlum olduğu üçün "mümkünsüzlük" vəziyyətini izah etmək üçün istifadə edilirdi. 1697-ci ildə hollandiyalılar Avstraliyada qara quya rast gəldikdən sonra bu söz dəyişikliyə uğrayaraq "imkansızın reallaşması" mənasında istifadə edilməyə başladı.

Maliyyə bazarlarında isə təxmin edilməyən, böyük təsir yaradan sürpriz hadisələr "qara qu" hadisəsi kimi tanınır. İnvestisiya müddəti uzandıqca bu kimi hadisələrə məruz qalma riski artır və "qara qu" hadisələri uzunmüddətli investisiyaların gəlirliyində çox mühüm rol oynayır. Birjada böyük hərəkətlilik baş verəndə şanslı tərəfdə olanların gəlirləri "qara qu" sayəsində çox yaxşı görünür. Şans faktoru, uzunmüddətli investisiyalarda bəlkə də ən mühüm performans parametridir.