“15 il öncəki dövrə nəzər yetirsək görərik ki, o vaxt mərkəzlə regionlar arasında böyük disbalans var idi. Lakin Azərbaycan rəhbərliyinin uzaq görən siyasəti və cənab Prezident İlham Əliyevin regionların sosial iqtisadi inkişafının dövlət proqramını ortaya qoyulması nəticəsində bu disbalans aradan qaldırıldı, bölgələrdə infrastruktur layihələri yüksək səviyyədə həyata keçirildi. Bununla da iş adamları regionlara maraq göstərməyə başladı. “Mətanət A” Şirkəti də dövlət siyasətinə dəstək olaraq regionların inkişafına töhfə verənlər sırasındadır".

Bu sözləri “Mətanət A” Şirkətinin rəhbəri, Azərbaycan Tikinti Materialları İstehsalçıları Assosiasiyasının Sədri Elxan Bəşirov Azərbaycan Sahibkarlar Konfederasiyasının “Regionların inkişafında sahibkarlığın rolu” mövzusundakı konfransında çıxış edərkən deyib.

Elxan Bəşirovun sözlərinə görə, “Mətanət A” Şirkəti regionlarda böyük işlər görür və həmin işlərin bariz nümunələrindən biri bu yaxınlarda Qazax rayonunda inşa olunan və ən müasir standartlara cavab verən əhəng zavodudur. Zavodun tikintisi tam yekunlaşıb və açılışa hazırdır. “Mətanət A” Rəhbəri Elxan Bəşirov Şirkətin cari işləri barədə də məlumat verib: 

“Hazırda biz cənab prezident İlham Əliyev tərəfindən verilən tapşırığa əsasən daha 4 zavodun tikintisini həyata keçirdirik. Dövlət başçısının sahibkarlar üçün yaratdığı şərait və bu sahəyə daim verdiyi dəstək bizi adıçəkilən iri layihələri həyata keçirməyə stimul verir”- deyən Elxan Bəşirov əlavə edib ki, prosesə təkan verən faktlardan bir də İqtisadiyyat Nazirliyi tərəfindən sahibkarlara isvestisiya təşviqi sənədinin 5 günə verilməsidir. 

“Biz eyni zamanda Sahibkarlara Kömək Milli Fonduna 2 mlrd. manatın ayrılması və həmin vəsaitin ölkə sahibkarlığının inkişafına yönləndirilməsini yüksək dəyərləndiririk. Çünki bu, gələcəkdə 100 minlərlə yeni iş yerinin açılmasına gətirib çıxaracaq.” 

ATMİA Sədrinin fikrincə, ixracın təşviq olunması öz növbəsində Azərbaycana valyuta axınına yol açır: “Biz sahibkar olaraq bu sahədə görülən işləri yüksək qiymətləndiririk. Son layihələrə nəzər salsaq əminliklə deyə bilərik ki, Azərbaycanda qeyri – neft sektoru yüksək sürətlə inkişaf edir və yerli məhsulların dünya bazarına çıxalırlmasına böyük imkan yaradır.

Elxan Bəşirov Azərbaycan Tikinti Materialları İstehsalçıları Assosiasiyasının adından qarşıdan gələn prezident seçkiləri ilə bağlı bəyanat da verib:

“Həm Assosiasiyanın, həm də rəhbərlik etdiyim Şirkət adından əminliklə deyə bilərəm ki, digər ölkələrdən fərqli olaraq, Azərbaycanda səhibkarların himayədarı məhz cənab prezident İlham Əliyevdir. Yalnız onun dəstəyi ilə ölkəmizdə sahibkarlıq sahəsi uğurla inkişaf edə bilər. Odur ki, qarşıdan gələn seçkilərdə ölkə sahibkarları bir nəfər kimi cənab prezidenti dəstəkləyəcək”.