Bu gün Bakı Ağır Cinayətlər Məhkəməsində "Muğanbank" ASC-nin külli miqdarda dələduzluqda təqsirləndirilən Nəsimi filialının kredit üzrə mütəxəssisi Novruz Vəliyevin cinayət işi üzrə məhkəmə iclası davam etdirilib.

Hakim Əfqan Hacıyevin sədrliyi ilə keçirilən prosesdə zərərçəkmiş Cavad Cavadov ifadə verib.

O bildirib ki, N.Vəliyev ona yaxşı pul qazanmaq təklifi verib: "Buna görə ona 19 600 dollar pul verdim. Sonra heç nə qazanmadım. Novruz həmin puldan mənə heç nə qaytarmadı. 19 600 dollar pulumu tələb edirəm".

N.Vəliyev isə C.Cavadova hissə-hissə 14 min dollar qaytardığını deyib.

Daha sonra şahid qismində Fəriq Quliyev dindirilib. O qeyd edib ki, N.Vəliyevin keçmiş iş yoldaşıdır, bankda kassir vəzifəsində çalışıb:

"Novruz Vəliyev kassadan müdir Natiq müəllimin icazəsi ilə pul götürüb, sonra qaytarırdı. Sonuncu dəfə məndən yenə 31 min 200 dollar pul götürdü. Lakin pulu gecikdirdi. Bu barədə Baş ofisin məlumatı oldu, qardaşıma da dedilər. Qardaşım evini və maşınını girov qoydu. Həmin puldan isə Novruz sadəcə 7 min dolları qaytarıb. Ümumilikdə isə kassdan 181 min 200 dollar pul götürüb. Bizim hər ikimiz Baş ofisə çağırılanda işdən azad olunduğumuzu dedilər".

O söyləyib ki, barəsində Cinayət Məcəlləsinin 322.1-ci (özbaşnalıq) maddəsi ilə cinayət işi başlanılıb, hazırda istintaq davam etdirilir.

Məhkəmənin növbəti iclası yanvarın 4-nə təyin edilib.

Qeyd edək ki, N.Vəliyev tanışları - Kənan Nağıyev və Cavad Cavadov etibarından sui-istifadə edərək, "forex" maliyyə birjasına bank kartı vasitəsilə mədaxil edib dövriyyəyə buraxmaqla hər ayın tamamında onlara qazanc vəd verərək aldatmaqda, bu yolla hər həmin şəxslərdən ümumilikdə 332 min 200 manat məbləğində vəsaitini ələ keçirməkdə ittiham olunur.

İş üzrə zərərçəkmiş şəxs qismində "Muğanbank" ASC-nin Nəsimi filialının müdiri Natiq Teymurov da tanınıb.

N.Vəliyev Cinayət Məcəlləsinin 178.3.2 (dələduzluq; külli miqdarda törədildikdə) maddəsi ilə ittiham edilib və barəsində həbs qətimkan tədbiri seçilib.

N.Vəliyev məhkəmədə özünü qismən təqsirli bilib. O, zərərçəkmiş şəxslərə vurulan ziyanın bir qismini ödədiyini söyləyib.

© Report