Göyçaylı fermerlər gəlirli sahə sayılan və bir çox xəstəliklərin dərmanı olan sarımsaq əkini ərazilərini xeyli genişləndiriblər. Sarımsaq əkini rayonun əsasən İnçə, Alxasafa, Dövranlı, Hacalıkənd, Məlikənd, Şıxbəy, Şıxəmir kəndlərində kütləvi şəkildə həyata keçirilib. Bu kəndlərdə demək olar ki, bütün təsərrüfat sahibləri öz həyətyanı ərazisində və pay torpağında sarımsaq əkini aparıb. Təxminən 40-45 dərəcə şaxtaya davamlılığı ilə seçilən sarımsaq yüksək məhsuldarlığı ilə fərqlənir.

Rayonda sarımsağın əsasən Şirvan sortu becərilir. Sentyabrda əkilir və mayın sonunda məhsul yığılır. Fermer Sərkər Süleymanov deyir ki, sarımsağı yaxşı becərəndə və vaxtında suvaranda hər hektardan 12-14 ton məhsul götürmək mümkündür. Fermer bildirir ki, 2015-ci ildə həyətə gələn müştərilərə bir kiloqram sarımsaq 3 manata satılırdı, ötən il isə bu məhsul 4-5 manata təklif olunub. İş adamları kəndlilərdən aldıqları sarımsağı əsasən Rusiya bazarlarına aparırlar. Bunun üçün onlar indidən kəndlərə gələrək əvvəlcədən pul ödənişi edirlər. Məhsul yığımı vaxtı isə birbaşa sahədən alıb aparırlar. Hazırda Göyçayın mərkəzi bazarında yerli sarımsağın bir kiloqramı 10-12 manata satılır.

Fermer Orxan Xəlilovun sözlərinə görə, dövlət qayğısından bəhrələnən kəndlilər ixracyönümlü məhsul olan sarımsağın əkin sahələrini ildən-ilə artırırlar: “Sarımsaq əkini və yığımı əl əməyi ilə aparılır. Biz yüksək məhsul əldə etmək üçün əziyyət çəkməli oluruq. Bitkiləri ziyanvericilərdən qorumaq üçün vaxtında dərmanlama işləri görülür, eləcə də keyfiyyətli məhsul əldə etmək məqsədilə gübrə verilir. Cari ildə bir hektar ərazidə sarımsaq əkmişəm və gələcəkdə əkin sahələrini daha da genişləndirəcəm”.

Göyçay rayon Kənd Təsərrüfatı İdarəsindən verilən məlumata görə, bu il ilk dəfə olaraq rayonun 17 kəndində, ümumilikdə, 25 hektar ərazidə sarımsaq əkini aparılıb.

© Azərtac