İsmayıllıda yeni iş yerlərinin açılması və əhalinin məşğulluğunu təmin etmək məqsədilə Keyvəndi kəndində iri heyvandarlıq təsərrüfatının, şəhərin M.F.Axundov küçəsində iki doqquzmərtəbəli yaşayış binasının, Heydər Əliyev prospektində beşmərtəbəli dördulduzlu hotelin, Tircan kəndi yaxınlığında Bədo İstirahət, Müalicə və Sanatoriya Mərkəzinin tikintisi davam etdirilib.

"Marja" xəbər verir ki, bunu İsmayıllı rayon icra hakimiyyətinin başçısı, əməkdar elm xadimi Mirdaməd Sadıqov bildirib.dan 

O qeyd edib ki, Kürdmaşı kəndində “Buta” şirkətlər qrupu tərəfindən 3 min ton tutumu olan soyuducu kameranın tikintisi başa çatdırılıb və iki kamerada məhsul qəbuluna başlanıb. Qalan sahələrdə isə tikinti-quraşdırma işləri davam edir.

İsmayıllı şəhərinin S.Ə.Şirvani küçəsində “Azərxalça” ASC tərəfindən Xalçaçılıq müəssisəsinin tikintisi başa çatıb və istehsalat fəaliyyətinə start verilib. Müəssisə tam gücü ilə işə düşdükdən sonra burada 170 nəfər toxucu işləyəcək. Hazırda obyektin həyətində abadlıq və yaşıllaşdırma işləri həyata keçirilir. 

MEYVƏÇİLİK START GÖTÜRÜR

Diyallı kəndində dəyəri 1200 min manat olan böyürtkən, moruq və s. giləmeyvələrinin yetişdirilməsi üçün örtülü təsərrüfat təşkil edilib. Bundan başqa, 2017-ci ilin yaz mövsümündə Kəlbənd kəndində 7, Qalınçaq kəndində 31,5 hektar sahədə intensiv meyvə bağları salınıb. Eyni zamanda Qubaxəlilli kəndi ərazisində 40, Tircan kəndində isə 7.5 hektar qoz bağı əkilib. Rayon mərkəzinə ən yaxın məsafədə yerləşən kəndlərdən olan Diyallı kəndi də prosesdən kənarda qalmayıb. Burada 3 hektar şaftalı, 5 hektar sahədə isə qoz bağı salınıb.

"BƏDO" SUYU

Milli Elmlər Akademiyasının Geologiya İnstitutu tərəfindən İsmayıllı rayonunun Tircan kəndindəki “Bədo” adlı bulağın suyunun tərkibi öyrənilib.  Böyrək, mədə-bağırsaq və öd kisəsində xəstəliyi olan insanlar köhnəlmiş yumurta iyi verən bu sudan içib şəfa tapır, həmçinin bu su həzm prosesinə də kömək edir. Laborator analizin nəticəsindən aydın olub ki, "Bədo"  hidrokarbonatlı, kükürd qazlı (H2S) mineral sudur. 

İsmayıllı əhalisi "Bədo"nu iyinə görə Dəvəçi rayonundakı Qalaaltı quyusunun suyu ilə eyni tipli hesab edir. Lakin alimlər onların tərkibində xeyli fərqlərin olduğunu qeyd edir. Belə ki, Qalaaltı suyunda maqnezium, həll olmuş üzvi maddələr - fenol, alifatik turşular, bitum və s. tərkiblər vardır, "Bədo"da isə yoxdur.