Mirzə Cümşüdov öz təsərrüfatında taxıl, pambıq, qarğıdalı, günəbaxan və digər bitkilər əkir, bağ salır, mal-qara bəsləyir, barama yetişdirir

Tərtər rayonunun İsmayılbəyli kənd sakini Mirzə Cümşüdov təsərrüfatını çoxsahəli istiqamətdə inkişaf etdirərək, uğurlu nəticələrə nail olub. 110 hektar sahəni əhatə edən təsərrüfatda növbəli əkin sistemi tətbiq edilməklə, taxıl, pambıq, qarğıdalı, günəbaxan, şəkər çuğunduru, soya, sarımsaq və digər bitkilər, eləcə də fındıq və tut tingləri becərilir. Fermer bitkiçiliklə yanaşı, ətlik istiqamətli heyvandarlıq, quşçuluq və baramaçılıqla da məşğuldur.

Mirzə Cümşüdov  bildirib ki, çoxsahəli təsərrüfat öz bəhrəsini verir. Növbəli əkin sisteminin tətbiqi, əkinlərin planlı təşkili, düzgün aqrotexniki qulluq yüksək məhsul götürməyə imkan yaradır.

Ölkəmizdə pambıqçılığa dövlət dəstəyindən bəhrələnən fermer bu il 11 hektar sahədə çiyid səpini həyata keçirib. Aqrotexniki qulluq sahəsində yaxşı məhsul yetişib və bir neçə gündən sonra pambıq yığımına başlanacaq. Ötən il yüksək məhsuldarlıq əldə edən fermer bu il hər hektardan 35 sentner məhsul gözləyir .

Fermer təsərrüfatının əsas sahələrindən biri də taxılçılıqdır. 80 hektarda taxıl yetişdirən Mirzə Cümşüdov əsasən, “Zirvə-85” buğda və “Qarabağ-22” arpa sortlarına üstünlük verib. Bitki xəstəliklərinə, zərərvericilərə və alaq otlarına qarşı vaxtlı-vaxtında mübarizə tədbirləri apardığına görə hər hektardan 47 sentner arpa və 52 sentner buğda götürə bilib.

Taxıl biçini başa çatan kimi həmin sahədə qarğıdalı əkən fermer bir ildə həm iki dəfə məhsul əldə edir, həm də dövlətdən iki dəfə subsidiya alır.

Təsərrüfatında, həmçinin 5,5 hektar şəkər çuğunduru becərən Mirzə Cümşüdov hektardan orta hesabla 53 ton məhsul yığaraq İmişli şəkər zavoduna təhvil verilib.

O, eyni zamanda 6 hektarda qarğıdalı, 2 hektarda günəbaxan, 8 hektarda yonca əkib. Sahələrdən 5,6 ton günəbaxan, 8,5 ton qarğıdalı toplayıb.

Bu il ilk dəfə 3 hektarda soya bitkisi əkən fermer 6,6 ton məhsul götürüb. Heyvandarlıq və quşçuluq üçün əvəzedilməz yem olan soyadan təsərrüfatındakı qaramalın və quşların bəslənməsində istifadə edir. Yeri gəlmişkən, onun təsərrüfatında hazırda 60 baş ətlik istiqamətli heyvan, iki min baş cücə var. Qaramalın və quşların yem təminatı təsərrüfatın hesabına ödənilir.

Mirzə Cümşüdov bu il bağçılıq təsərrüfatının yaradılmasına da başlayıb. Belə ki, 5100 ədəd fındıq, 20 min ədəd xurma, gilas, şaftalı, alma, armud, alça tingləri əkib.

Bu da hamısı deyil. Fermer cari ildə 2 qutu (38 qram) ipəkqurdu toxumu yetişdirib, 120 kiloqram barama istehsal edib. O, gələcəkdə baramaçılığı daha da genişləndirmək məqsədilə 1,65 hektar sahədə Çindən gətirilmiş 16 min 500 ədəd tut tingi əkib.

Təsərrüfatda ilin bütün vaxtında qızğın iş gedir. Hazırda sentyabr ayında əkilmiş 3 hektar sarımsaq sahəsində becərmə işləri görülür, 50 hektarda taxıl səpini aparılır. Yaxın günlərdə isə silosluq qarğıdalı biçininə başlanılacaq.

Tərtərli fermer növbəti ilin yazlıq əkinlərini də indidən planlaşdırır. 2018-ci təsərrüfat ilində 1 hektarda kartof, 15 hektarda soya, 5 hektarda şəkər çuğunduru, 5 hektarda pambıq, 4 hektarda qarğıdalı, 1 hektarda qarabaşaq əkməyi, 10 qutu ipəkqurdu toxumu yetişdirməyi nəzərdə tutur.

Fermer əldə etdiyi uğurlara dövlət dəstəyi və gərgin zəhmət sayəsində nail olduğunu deyir.

© Azərtac