Cavid İmamoğlu:"Cəmiyyətdə bu qəbul olunmur deyə, insanlar altdan-altdan iş görməli deyillər ki? Onsuz da, əxlaqlı qadın belə yollara əl atıb, həyat yoldaşına xəyanət etməz"

"Otellərdə insanlardan nikah kağızının istənilməsi, həqiqətən absurddur”.

Bunu sosioloq Cavid İmamoğlu deyib. 

O bildirib ki, nikah kağızının tələb edilməsi insanların hüquqlarının məhdudlaşdırılması deməkdir:

"Çünki otel özəl müəssisədir və insanlara xidmət göstərir. Otellərdə kimin yaşamağının əhəmiyyəti yoxdur, hər kəsə şərait yaratmalıdır. Gələn qonaqlar ailəlidir, yaxud əməkdaşdır və ya sevgilidir otel sahibləri üçün heç bir önəmi olmamalıdır. Təəssüf ki, bizdə belə ayrımlar hələ də davam etməkdədir.

Bəzən olur ki, yaxın dostlar, iş yoldaşları səfərə çıxır. Oteldə iki ayrı otağı icarəyə götürmək büdcələrinə uyğun olmaya bilər. Amma otel sahibi nikah şəhadətnaməsi tələb etdiyinə görə, ayrı-ayrı otaqlar götürüb, əlavə xərcə düşürlər. Bu məsələ insanların azad seçim haqqına, istirahət hüququna zərər gətirir.

Ümumiyyətlə, Azərbaycanda xidmət sahəsində insanların şəxsi həyatına mümkün qədər az müdaxilə edilməlidir. Çünki bu müəssisə düzgün xidmət göstərirsə, müştərinin ailəli olub-olmadığı, yanında gətirdiyi qadının nişanlısı, həyat yoldaşı olması otel sahiblərini maraqlandırmamalıdır”.

Azərbaycan reallığında nikahdan kənar ailə münasibətlərinin olduğunu diqqətə çatdıran C.İmamoğlu vurğulayıb ki, insan yaşadığı qadınla otelə getdikdə nikah kağızı göstərməyə məcbur deyil:

"Ola bilər ki, kimsə nikahsız yaşayır. Hansısa rayona dincəlməyə getdikdə nikah şəhadətnaməsi olmadığına görə, oteldə qala bilmir. Bu, çox mənasız və insanlığa xidmət etməyən prosedurdır. Əlavə bürokratiya yaratmaqla, insanların istirahət etmək hüququnu məhdudlaşdırmaq düzgün deyil.

Bəzi otel sahibləri iddia edir ki, istirahət adı ilə gəlib, yanında əxlaqsız qadınları gətirənlər də olur. Lakin nəzərə almaq lazımdır, hansısa kişinin yanında gətirdiyi qadının əxlaqını sorğulamaq otelə qalmayıb. Cəmiyyətdə bu qəbul olunmur deyə, insanlar altdan-altdan iş görməli deyillər ki? Onsuz da, əxlaqlı qadın belə yollara əl atıb, həyat yoldaşına xəyanət etməz.

Düşünün ki, bir şəxsin 3 arvadı var. Biri ilə nikah bağlayıb, ikisi ilə rəsmi nikahı yoxdur. Həmin şəxs həyat yoldaşını götürüb, istirahətə gedir və oteldə qalmalıdır. Heç bir əxlaqsız hərəkətə yol vermirsə, başqalarını narahat etmirsə, həmin şəxsdən hansı əsasla nikah sənədi tələb edilməlidir? Belə halda həmin şəxsin hüququ pozulur”.

Qeyd edək ki, mədəniyyət və turizm nazirinin müavini Nazim Səmədov da otellərdə nikah kağızının tələb edilməsini düzgün hesab etməyib. N. Səmədov bildirib ki, bu hər hansı işçinin özbaşınalığı da ola bilər.

© Sherg.az