Marketlərdə kərə yağlarının qiymətlərinin kəskin artdığı müşahidə olunur. İdxalçılar və Dövlət Gömrük Komitəsi qiymət artımlarını dünya birjalarında kərə yağının bahalaşması ilə izah edirlər.

“Marja”nın müxbirinin marketlərdə apardığı müşahidələri göstərir ki, yerli istehsal olan kərə yağları da ucuz satılmır. Onların qiymətləri xarici analoqlarına çox yaxındır.

Marketlərdə xaricdən idxal olunan kərə yağlarının qiymətləri təxminən 17-21 manat civarında ikən, yerli kərə yağlarının kiloqramı təxminən 16-17 manatdır.

Məsələn, “Bazarstore” supermarketində xarici kərə yağlarından “Westgold”un 1 kiloqramı 16,90 manata, "Ankor" 16,90 manata,  “Bestcow” isə 16,93 manata təklif olunur. Yerli qablaşdırılmış “Səba” kərə yağının kiloqramı isə 15,90 manatdır. Yəni, xarici yağlardan təxminən 1 manat ucuz satılır.

200 qramlıq “President” 4 manata, “Westgold” kərə yağı 3,90 manata, "Dayaruşka" 3,80 manata, “Bestcow”  3.71 manata, "Wellington" 3,67 manata satılarkən, 200 qramlıq “Səba” kərə yağı 3,65 manata təklif olunur.

“Milla” kərə yağı “Səba”dan da bahadır. “Milla”nın kiloqramı  17,40 manata, 180 qramlıq qablaşdırmada isə 3,13 manata təklif olunur. Qeyd edək ki, "Milla" kərə yağının istehsalçısı "Azerbaijan Food and Packaging Company (AzFP)" şirkətidir.

Qeyd edək ki, “Atena” da kərə yağı istehsal edirdi. Lakin son zamanlar həmin yağlara marketlərdə rast gəlinmir. Ötən il 1 kq “Atena” kərə yağı 8-8,50 manata satılırdı.

“SÜD, İŞIQ, SU BAHALAŞIB”

“Səba” ASC bildirir ki, törəmə şirkəti “Biləsuvar Aqro” zavodu südü fermerlərdən alır. Fermerlər də südün qiymətini qaldırıblar:

“Aldığımız xammalların qiymətinin qalxması, məhsulun daşınması, müəssisədə elektrik enerjisinin, suyun qiyməti, xarici valyuta ilə alınan qablaşdırma məmulatları, istifadə etdiyimiz xidmətlərin qiymətinin qalxması qiymətlərimizə təsir edir”. 

“Səba”ASC-dən qeyd edilib ki, çəki ilə olan kərə yağının kiloqramı 14.90 manata təklif olunur: “Keyfiyyətdə "Səba" yağı ilə rəqabət apara biləcək yağlar "Səba"dan azı 20% bahadır”.

Qeyd edək ki, ötən ilin Oktyabr ayında marketlərdə xarici istehsal “Ankor” və“Westgold” yağlarının kiloqramı 9-10 manata,  “Valio” isə 12 manata satılırdı.