Azərbaycanda mobil telefonların və digər elektron cihazların da POS-terminal kimi tanınması nəzərdə tutulur.

Marja.az xəbər verir ki, bunu İqtisadiyyat Nazirliyinin Aparat rəhbərinin müavini Kamran Əhmədov Milli Məclisin İqtisadi siyasət, sənaye və sahibkarlıq komitəsinin bu gün keçirilən iclasında bildirib.

Onun sözlərinə görə, “Elektron ticarət haqqında” qanuna təklif edilən dəyişikliklər POS-terminal anlayışının müasir ödəniş texnologiyalarına uyğunlaşdırılmasını nəzərdə tutur.

Kamran Əhmədov qeyd edib ki, hazırda qanunvericilikdə POS-terminal əsasən ödəniş kartları ilə əməliyyatların aparılması üçün istifadə olunan xüsusi avadanlıq kimi müəyyən edilir. Təklif olunan yeni yanaşma isə POS-terminal anlayışının daha geniş texnoloji imkanları əhatə etməsinə şərait yaradacaq.

“Hazırda qanunda POS-terminal anlayışı əsasən ödəniş kartları ilə əməliyyat aparmaq üçün istifadə olunan avadanlıq kimi müəyyən edilib. Yeni yanaşma isə nağdsız ödənişlərin, o cümlədən təmassız ödənişlərin həyata keçirilməsini əhatə edir”, – deyə nazirlik rəsmisi bildirib.

Kamran Əhmədovun sözlərinə görə, dəyişikliklər nəticəsində yalnız xüsusi POS-terminal avadanlıqları deyil, müvafiq proqram təminatı ilə təchiz edilmiş mobil telefonlar və digər son istifadəçi cihazları da POS-terminal hesab edilə biləcək.

Bu yanaşma sahibkarlara ayrıca fiziki POS-terminal avadanlığından istifadə etmədən, uyğun mobil cihazlar və proqram təminatı vasitəsilə nağdsız ödənişləri qəbul etmək imkanı yarada bilər.

Dəyişikliklərin əsas məqsədlərindən biri elektron ticarət və nağdsız ödənişlərlə bağlı qanunvericiliyin müasir texnoloji imkanlara uyğunlaşdırılması, eləcə də qüvvədə olan hüquqi normalar arasındakı ziddiyyətlərin aradan qaldırılmasıdır.

Qeyd edək ki, mobil telefonların POS-terminal kimi istifadə edilməsi üçün onların müvafiq texniki və proqram təminatı tələblərinə cavab verməsi vacibdir. Təklif edilən dəyişiklik bütün mobil telefonların avtomatik olaraq POS-terminal funksiyasına malik olması demək deyil.

Qanun layihəsi qəbul ediləcəyi təqdirdə, mobil cihazlardan ödəniş qəbulu vasitəsi kimi istifadənin hüquqi əsasları genişlənəcək.

Hər gün yeni vakansiyalar - AzVak.az-da

© APA